Almaty qalasynda áleýmettik turaqtylyqty qamtamasyz etý maqsatynda qosymsha 8,3 mlrd teńge bólinedi. Onyń 4 mlrd teńgesi bilim berý salasyn damytýǵa jumsalmaq, dep habarlaidy Dalanews.kz.
Bul týraly máslihattyń kezekti sessiiasynda Almaty qalasy Qarjy basqarmasynyń basshysy Qanat Sýhambekov málimdedi.
Bólingen qarajattyń bir bóligi bilim berý nysandaryn seismikalyq nyǵaitý jáne qaita jańartý jumystaryn aiaqtaýǵa baǵyttalady. Atap aitqanda, Si Sinhai kóshesindegi jáne Bostandyq aýdany Orbita-3 shaǵyn aýdanyndaǵy balabaqshalardy seismikalyq kúsheitý jáne jańartý jumystary júrgizilip jatyr. Bul jobalardy tolyq aiaqtaý úshin 2025 jyldyń shildesine deiin qosymsha 1 mlrd teńge qarastyrylǵan.
Sonymen qatar 9 bilim berý nysanyna qurylys jáne qaita jańartý boiynsha konkýrstyq rásimderdi ótkizý úshin qarjy bólinbek.
"Alataý jáne Naýryzbai aýdandaryndaǵy 3 balabaqsha; Alataý, Bostandyq, Medeý jáne Túrksib aýdandaryndaǵy 5 mektep; Alataý aýdanynyń Saialy shaǵyn aýdanynda 1 damý jáne shyǵarmashylyq ortalyǵy bar. Sondai-aq, 26 mektepti pándik stendtermen jáne partalarmen jaraqtandyrý kózdelgen. Osylaisha, qosymsha qarajat oqý jaǵdailaryn jaqsartýǵa jáne qaladaǵy bilim berý sapasyn arttyrýǵa baǵyttalatyn bolady", – dedi Qanat Sýhambekov.
Jalpy, bul qarajat oqý jaǵdaiyn jaqsartýǵa jáne bilim sapasyn arttyrýǵa baǵyttalady.
Densaýlyq saqtaý salasyna da qosymsha 460 mln teńge bólindi. Bul qarjynyń basym bóligi rezidentýra stýdentterine 120 grant pen stipendiia tóleýge, sondai-aq 7 meditsinalyq kolledjde 1 206 jańa stýdenttiń oqý aqysy men stipendiiasyn qamtamasyz etýge jumsalmaq.
