Qalalyq tótenshe jaǵdaılar departamenti 28 shildege deıin Almatyda aýa temperatýrasy kúndiz 35–39°C-qa deıin kóteriledi dep eskertti. Qazir qalada órt qaýiptiliginiń eń joǵary – 5-sanaty saqtalyp otyr. Mundaı jaǵdaıda kez kelgen ushqyn úlken órtke ulasýy múmkin, dep habarlaıdy Dalanews.kz.

Mekemeniń málimetinshe, jyl basynan beri megapolıste 300-den astam qurǵaq shóptiń janý deregi tirkelgen. Keı jaǵdaılarda órt taýly aımaqtarǵa taralyp, turǵyn úılerge qaýip tóndirgen.

Qazir qala ákimdigimen birlesip, 104 shaqyrym aýmaqtaǵy shóp shabylyp, aldyn alý sharalary júrgizilýde.

Qutqarýshylar almatylyqtar men qala qonaqtaryn qaýipsizdik erejelerin qatań saqtaýǵa shaqyrady:

• qurǵaq shóp mańynda ot jaqpańyz jáne shylym shekpeńiz;

• birneshe elektr qurylǵysyn bir rozetkaǵa qospańyz – bul qysqa tuıyqtalýǵa jáne órt shyǵýyna sebep bolýy múmkin;

• kúnniń ystyǵynda avtokólik ishinde balalardy qaldyrmańyz;

• kún ótip ketpes úshin ashyq aýada uzaq ýaqyt júrmeńiz.

TJD ókilderi eskertedi: órt saldarynan adam ómiri men múlkine zıan kelse, kináliler qylmystyq jaýapkershilikke tartylady.