قالالىق توتەنشە جاعدايلار دەپارتامەنتى 28 شىلدەگە دەيىن الماتىدا اۋا تەمپەراتۋراسى كۇندىز 35–39°C-قا دەيىن كوتەرىلەدى دەپ ەسكەرتتى. ءقازىر قالادا ءورت قاۋىپتىلىگىنىڭ ەڭ جوعارى – 5-ساناتى ساقتالىپ وتىر. مۇنداي جاعدايدا كەز كەلگەن ۇشقىن ۇلكەن ورتكە ۇلاسۋى مۇمكىن، دەپ حابارلايدى Dalanews.kz.

مەكەمەنىڭ مالىمەتىنشە، جىل باسىنان بەرى مەگاپوليستە 300-دەن استام قۇرعاق ءشوپتىڭ جانۋ دەرەگى تىركەلگەن. كەي جاعدايلاردا ءورت تاۋلى ايماقتارعا تارالىپ، تۇرعىن ۇيلەرگە ءقاۋىپ توندىرگەن.

ءقازىر قالا اكىمدىگىمەن بىرلەسىپ، 104 شاقىرىم اۋماقتاعى ءشوپ شابىلىپ، الدىن الۋ شارالارى جۇرگىزىلۋدە.

قۇتقارۋشىلار الماتىلىقتار مەن قالا قوناقتارىن قاۋىپسىزدىك ەرەجەلەرىن قاتاڭ ساقتاۋعا شاقىرادى:

• قۇرعاق ءشوپ ماڭىندا وت جاقپاڭىز جانە شىلىم شەكپەڭىز؛

• بىرنەشە ەلەكتر قۇرىلعىسىن ءبىر روزەتكاعا قوسپاڭىز – بۇل قىسقا تۇيىقتالۋعا جانە ءورت شىعۋىنا سەبەپ بولۋى مۇمكىن؛

• كۇننىڭ ىستىعىندا اۆتوكولىك ىشىندە بالالاردى قالدىرماڭىز؛

• كۇن ءوتىپ كەتپەس ءۇشىن اشىق اۋادا ۇزاق ۋاقىت جۇرمەڭىز.

تجد وكىلدەرى ەسكەرتەدى: ءورت سالدارىنان ادام ءومىرى مەن مۇلكىنە زيان كەلسە، كىنالىلەر قىلمىستىق جاۋاپكەرشىلىككە تارتىلادى.