Almatyda kórnekti saiasatker Altynbek Sársenbaiulynyń rýhyna arnalǵan eske alý jiyny ótti. Sharany marqumnyń otbasy uiymdastyrdy. Basqosýǵa onyń zamandas áriptesteri, dostary, qoǵam qairatkerleri men azamattyq belsendiler jinaldy, dep habarlaidy Dalanews.kz.
2006 jylǵy 11 aqpanda Altynbek Sársenbaiuly kómekshisi Baýyrjan Baibosyn jáne júrgizýshisi Vasilii Jýravlevpen birge iz-túzsiz joǵalǵan. Eki kúnnen keiin olardyń máiiti Almaty mańyndaǵy taýly aýmaqtan tabylyp, úsheýiniń de atyp óltirilgeni belgili boldy. Alaida bul qylmystyń barlyq qyry áli kúnge deiin tolyq ashylǵan joq.
Quqyq qorǵaýshy Evgenii Jovtis saiasi sipattaǵy kisi ólimi isteri kóbine ádil tergelmei, saiasi yqpalmen júretinin aitty. Onyń pikirinshe, bul is te túbegeili, beitarap tergelip, qylmysqa qatysy bar barlyq tulǵalar anyqtalýy tiis.
Marqumnyń týystary men áriptesteri onyń ólimine sol kezdegi memleket basshysy Nursultan Nazarbaev jaýapty dep sanaitynyn jetkizdi. Altynbektiń aǵasy Rysbek Sársenbaiuly isti qaita qaraý týraly Prezidentke, Bas prokýrorǵa jáne Joǵarǵy sotqa resmi aryz joldanǵanyn habarlady.
Onyń aitýynsha, bul is mindetti túrde qaita jandanýy kerek. «Biz qylmysty uiymdastyrǵandardan bastap, tikelei atqan adamdarǵa deiin barlyǵy áshkerelenýin talap etemiz. Bizdiń maqsatymyz – kek alý emes, ádildikke jetý», – dedi ol.
Altynbek Sársenbaiuly 1993–2001 jyldary Qoǵamdyq kelisim jáne aqparat ministrligin basqarǵan. Keiin Qaýipsizdik keńesiniń hatshysy, sondai-aq Reseidegi Qazaqstan elshisi qyzmetterin atqardy. 2003 jyldan bastap oppozitsiiaǵa ótip, bilikti ashyq synady. Ártúrli kezeńde qastandyqtyń tapsyrys berýshisi retinde birneshe adamnyń aty ataldy. Olardyń qatarynda Senat apparatynyń burynǵy basshysy Erjan Ótembaev, marqum Rahat Áliev jáne UQK-niń eks-tóraǵasy Álnur Musaev bar.
