Almatyda Qazaqstannyń eńbek sińirgen qairatkeri, “Parasat” ordenininiń iegeri, kórnekti teatr jáne kino akteri Bekjan Turystyń ómiri men shyǵarmashylyǵyna arnalǵan “Bekzat bolmys” kitabynyń tanystyrylymy ótti, dep habarlaidy Dalanews.kz.
Kitap “Biz biletin Bekjan”, “Oi túbinde jatqan sóz”, Jyrǵa ainalǵan júrek” dep atalatyn úsh bólimnen turady. Birinshi bólimde kino jáne teatr qairatkerleri Asanáli Áshimov, Tuńǵyshbai Jamanqulov, Áýbákir Rahimov, Áliia Bópejanova, jazýshy Zeinep Ahmetova bastaǵan akterdiń zamandastary men keiingi tolqyn ini-qaryndastarynyń shynaiy jazbalary toptassa, ekinshi bólimde akterdiń BAQ-qa bergen mazmundy suhbattary endi. Úshinshi bólimde tanymal aqyndardyń Bekjan Turysqa arnaǵan jyrlary toptastyryldy.
Jinaqta teatr synshylary men rejisserler, akterler Bekjan Turystyń akterlik eńbegine jan-jaqty toqtalyp, onyń qazaq teatr óneriniń damýyna, akterlik mekteptiń shyńdalýyna qosqan úlesine kásibi turǵyda baǵa beredi. Azamattyq bolmysyna da toqtalyp, tulǵalyq ereksheligin atap ótedi. Kitap teatr, óner salasyndaǵy mamandar men bilim alýshylarǵa, ónerdi qurmet tutatyn qalyń oqyrmanǵa arnalady. Ol qazaq ónertaný salasyna ǵana emes, tulǵataný salasyna qosylǵan jinaq retinde qundy.
“Asanberdi” Jeke kásipkerliginiń iesi, kásipker-metsenat Ainur Asanberdi demeýshilik jasaǵan jinaq, belgili dizainer-betteýshi, baspager Baqyt Oisanyń ARNA-B baspasynan jaryq kórdi.
Kitapqa engen sýretter Bekjan Turys taban aýdarmai qyzmet etip kele jatqan M.Áýezov atyndaǵy Qazaq ulttyq drama teatrynyń mýzeiinen alyndy.
Kitap qurastyrýshylardyń biri Dosym Zikiriia atalǵan týyndyǵa qatysty pikir bildirdi.
“...Biz kóbine bir adamnyń kózi ketkesin ǵana ol týraly jaqsy sóz aitamyz, ondai erensizdigimizdi “qolda barda altynnyń qadiri joq” dep aqtaǵansyp qoiamyz. “Jaqsynyń jaqsylyǵyn ait, nury tasysyn”, – degendi de aitqan ózimiz. Osy jinaqty shyǵarýǵa da, jaqsy jannyń kóńili jarqyrap júrsinshi, degen oimen kirisken edik. Bir-birimizdiń qadirimizdi janymyzda júrgen kezde bileiikshi. Odan da mańyzdysy meiirimge sýsaǵan osynaý shaqta bir-birimizdi shyn qýantyp, jarym lepes bolsa da jyly sózimizdi arnap júreiikshi. Osy jinaqtyń jaryq kórýine atsalysqan meiirban jandardyń bárine de shyn júrekten shyqqan alǵysymdy bildiremin! Tórt qubylylaryńyz túgel bolsyn!”, – dedi ol.
Aita keteiik, kitap 1000 danamen jaryq kórdi.
