الماتىدا قازاقستاننىڭ ەڭبەك سىڭىرگەن قايراتكەرى، “پاراسات” وردەنىنىنىڭ يەگەرى، كورنەكتى تەاتر جانە كينو اكتەرى بەكجان تۇرىستىڭ ءومىرى مەن شىعارماشىلىعىنا ارنالعان “بەكزات بولمىس” كىتابىنىڭ تانىستىرىلىمى ءوتتى، دەپ حابارلايدى Dalanews.kz.
كىتاپ “ءبىز بىلەتىن بەكجان”، “وي تۇبىندە جاتقان ءسوز”، جىرعا اينالعان جۇرەك” دەپ اتالاتىن ءۇش بولىمنەن تۇرادى. ءبىرىنشى بولىمدە كينو جانە تەاتر قايراتكەرلەرى ءاسانالى ءاشىموۆ، تۇڭعىشباي جامانقۇلوۆ، اۋباكىر راحيموۆ، ءاليا بوپەجانوۆا، جازۋشى زەينەپ احمەتوۆا باستاعان اكتەردىڭ زامانداستارى مەن كەيىنگى تولقىن ءىنى-قارىنداستارىنىڭ شىنايى جازبالارى توپتاسسا، ەكىنشى بولىمدە اكتەردىڭ باق-قا بەرگەن مازمۇندى سۇحباتتارى ەندى. ءۇشىنشى بولىمدە تانىمال اقىنداردىڭ بەكجان تۇرىسقا ارناعان جىرلارى توپتاستىرىلدى.
جيناقتا تەاتر سىنشىلارى مەن رەجيسسەرلەر، اكتەرلەر بەكجان تۇرىستىڭ اكتەرلىك ەڭبەگىنە جان-جاقتى توقتالىپ، ونىڭ قازاق تەاتر ونەرىنىڭ دامۋىنا، اكتەرلىك مەكتەپتىڭ شىڭدالۋىنا قوسقان ۇلەسىنە كاسىبي تۇرعىدا باعا بەرەدى. ازاماتتىق بولمىسىنا دا توقتالىپ، تۇلعالىق ەرەكشەلىگىن اتاپ وتەدى. كىتاپ تەاتر، ونەر سالاسىنداعى ماماندار مەن ءبىلىم الۋشىلارعا، ونەردى قۇرمەت تۇتاتىن قالىڭ وقىرمانعا ارنالادى. ول قازاق ونەرتانۋ سالاسىنا عانا ەمەس، تۇلعاتانۋ سالاسىنا قوسىلعان جيناق رەتىندە قۇندى.
“اسانبەردى” جەكە كاسىپكەرلىگىنىڭ يەسى، كاسىپكەر-مەسەنات اينۇر اسانبەردى دەمەۋشىلىك جاساعان جيناق، بەلگىلى ديزاينەر-بەتتەۋشى، باسپاگەر باقىت ويسانىڭ ARNA-B باسپاسىنان جارىق كوردى.
كىتاپقا ەنگەن سۋرەتتەر بەكجان تۇرىس تابان اۋدارماي قىزمەت ەتىپ كەلە جاتقان م.اۋەزوۆ اتىنداعى قازاق ۇلتتىق دراما تەاترىنىڭ مۋزەيىنەن الىندى.
كىتاپ قۇراستىرۋشىلاردىڭ ءبىرى دوسىم زىكىريا اتالعان تۋىندىعا قاتىستى پىكىر ءبىلدىردى.
“...ءبىز كوبىنە ءبىر ادامنىڭ كوزى كەتكەسىن عانا ول تۋرالى جاقسى ءسوز ايتامىز، ونداي ەرەنسىزدىگىمىزدى “قولدا باردا التىننىڭ ءقادىرى جوق” دەپ اقتاعانسىپ قويامىز. “جاقسىنىڭ جاقسىلىعىن ايت، نۇرى تاسىسىن”، – دەگەندى دە ايتقان ءوزىمىز. وسى جيناقتى شىعارۋعا دا، جاقسى جاننىڭ كوڭىلى جارقىراپ ءجۇرسىنشى، دەگەن ويمەن كىرىسكەن ەدىك. ءبىر-بىرىمىزدىڭ ءقادىرىمىزدى جانىمىزدا جۇرگەن كەزدە بىلەيىكشى. ودان دا ماڭىزدىسى مەيىرىمگە سۋساعان وسىناۋ شاقتا ءبىر-بىرىمىزدى شىن قۋانتىپ، جارىم لەپەس بولسا دا جىلى ءسوزىمىزدى ارناپ جۇرەيىكشى. وسى جيناقتىڭ جارىق كورۋىنە اتسالىسقان مەيىربان جانداردىڭ بارىنە دە شىن جۇرەكتەن شىققان العىسىمدى بىلدىرەمىن! ءتورت قۇبىلىلارىڭىز تۇگەل بولسىن!”، – دەدى ول.
ايتا كەتەيىك، كىتاپ 1000 دانامەن جارىق كوردى.
