Almatynyń Medeý aýdanynda №98 mekteptiń burynnan kele jatqan máselesi sheshimin tabýda - 1964 jyly salynǵan ǵimarat búginde tehnikalyq talaptarǵa sáikes kelmeidi, ony aýystyrý qajet. Bul týraly qalalyq bilim basqarmasy málimdedi,– dep habarlaidy Dalanews.kz
Jobalyq qýaty 640 oryn bolsa da, búginde mektepte 1190 oqýshy bilim alyp jatyr. Shamadan tys júkteme oqýshylar men muǵalimderge qolaisyzdyq týǵyzyp, bilim berý sapasyna keri áser etýde.
Mektep bir qabatty dálizder arqyly jalǵasqan úsh eki qabatty pavilonnan turady. Ondaǵan jyl boiy paidalaný barysynda injenerlik jeliler eskirip, qazirgi talaptarǵa sai sport zaly joq, tamaqtaný men muǵalimderdiń tolyqqandy jumys isteýine qajetti jaǵdai jasalmaǵan.
Júktemeni ýaqytsha azaitý maqsatynda 2025 jyldyń qańtar aiynda mektepke sol mekenjaida ornalasqan burynǵy mýzyka mektebiniń ǵimaraty berildi. Qazir bul ǵimaratta bastaýysh synyp oqýshylary oqyp jatyr – ol 300 orynǵa arnalǵan. Degenmen, bul máseleni tolyq sheshe almaidy, óitkeni aýdanda jańa oqýshylar legi áli de artyp otyr.
Máseleniń sheshimi 1500 oryndyq jańa mektep ǵimaratynyń salynýy bolmaq. Qazirdiń ózinde Tátibekov, Poletaev jáne Beiimbetov kóshelerindegi jer telimderin memlekettik qajetke alý týraly qaýly qabyldandy. Jańa ǵimarat qazirgi qaýipsizdik jáne jailylyq talaptaryna tolyqtai sai bolady.
Buǵan deiin turǵyndar usynǵan taǵy bir balama – Tekemet kóshesindegi burynǵy balabaqsha ǵimaratyn satyp alý nusqasy da qaralǵan. Alaida ol nysan ziratqa jaqyn sanitarlyq-qorǵaý aimaǵynda ornalasqan, kireberis joldary tar, al tyǵyz qurylys saldarynan kólik qoljetimdiligi men qaýipsiz jaiaý jol jasaý múmkin bolmaǵan.
Qalanyń bilim basqarmasynyń málimetinshe, qurylysqa daiyndyq jumystary bastalyp ketken. Jańa oqý ǵimaraty tek oqýshy sanynyń artý máselesin sheship qana qoimai, oqýshylar men muǵalimder úshin zamanaýi ári qolaily bilim berý ortasyn qalyptastyrýǵa múmkindik beredi.
