Almatyda monitoring barysynda 500-ge jýyq zańsyz ornalastyrylǵan statsionarlyq emes saýda nysandary (budan ári – SESN) anyqtaldy,- dep habarlaidy Dalanews.kz
2025 jyly 4 aqpannan bastap Kásipkerlik jáne investitsiialar basqarmasy Jumys tobynyń qatysýshylarymen birlesip kóshe saýdasy nysandaryn joiýǵa kiristi. Búgingi tańda memlekettik qor jerlerinde ornalasqan 290 SESN buzyldy. Qalǵan 210 SESN-di buzý jumystary biyl 15 naýryzǵa deiin aiaqtalady. Kommýnaldyq qyzmetter bul nysandarǵa zańsyz qosylǵan injenerlik jelilerdi ajyratýdy jalǵastyryp otyr.
Sondai-aq, osy jumys aiasynda 222 oiyn-saýyq apparaty (silomerler) joiyldy. Buǵan qosa, qalada jer ýchaskelerine myqtap bekitilgen 32 kúrdeli qurylys anyqtaldy. Jumys toby olardy májbúrli túrde buzýdy uiymdastyrý maqsatynda sotqa talap-aryz jiberýge bastamashylyq jasady.
Almatylyqtar bul jumysqa oń baǵa berip otyr. Áýezov aýdanynyń turǵyny Aigúl Kúljahanova osy máseleniń aýdanda tórt jyldan beri ózekti ekenin aitady.
«Alǵashynda bizdiń Fýrkat kóshesinde eki dúńgirshek paida boldy, keiin taǵy ekeýi ornatyldy. Birinshiden, olar jaqynda salynǵan vorkaýt-aimaqty, skeit jáne balalar alańyn jaýyp tastady. Ekinshiden, sanitarlyq jaǵdai óte nashar – ydysty dúńgirshektiń artynda qarapaiym legende jýatyn, al kúndiz olardyń janynda oramalar, paketter men tamaq qaldyqtary shashylyp jatatyn. Sonymen qatar, jergilikti kolledj stýdentteri men mektep oqýshylary osy mańda kóp jinalatyn, bul mektep aýmaǵyna erkin kirýge kedergi keltiretin. Ári dúńgirshekter gúlzardyń ornyna qoiylyp, ol tolyqtai jabylyp qaldy. Men eki ret e-Otinish arqyly bilikke hat jazyp, tártip ornatýdy suradym. Bizdiń únimizge qulaq asqanyna óte qýanyshtymyn. Jaqynda barlyq tórt dúńgirshek alynyp tastaldy, aýmaq tazartyldy, balalar alańyna kireberis ashyldy. Endi kóktemde gúlzarymyz qaitadan gúldeidi dep úmittenemin», - deidi Aigúl Kúljahanova.
Medeý aýdanynyń turǵyny Tatiana Kasatkina da dúńgirshekter súrilgennen keiin keńistik ashylyp, tazalyq ornady deidi.
«Aqyry Dostyq dańǵyly boiyndaǵy, sonyń ishinde «Dostyq plaza» saýda ortalyǵy men «Orbita» shaǵyn aýdanyndaǵy dúńgirshekterdi alyp tastaǵanyna qýanyshtymyz. Buryn fastfýd satyp alýshylardyń shashyp ketken qoqystary úiilip jatatyn, aryqtarda egeýquiryqtar júgirip júretin. Bizge áli de tamaqtaný mádenieti men tazalyqqa úirený kerek siiaqty. Adamdar tamaqtanyp bolǵan soń qoqysty jerge laqtyra salady. Dúńgirshekterdiń mańyndaǵy qoqys jáshikteri únemi tolyp turatyn. Onyń ústine, kóshede asyǵys jelinetin fastfýdtyń qanshalyqty paidaly ekeni de kúmándi. Dúńgirshek qyzmetkerleriniń tazalyǵy men tamaq daiyndaýdaǵy sanitarlyq talaptarǵa da kúmánim bar. Sonymen qatar, Medeý aýdanyna týrister jii keledi, sondyqtan qalanyń jalpy kórinisine kóńil bólý mańyzdy. Kóktemde qalamyz odan ári tazaryp, qulpyra tússe eken deimin», – dedi T.Kasatkina.
Eske sala keteiik, zańsyz SESN-derdi anyqtaý jáne olardy súrý jumystary Almaty qalasynyń Kásipkerlik jáne investitsiialar basqarmasy men aýdan ákimdikteri kóshedegi saýdany joiý jónindegi Jumys tobynyń múshelerimen birlese otyryp kúndelikti júrgizilip jatyr.
