Memleket basshysynyń sporttyq infraqurylymdy jáne buqaralyq sportty damytý jónindegi tapsyrmalary aiasynda Almatyda halyqaralyq deńgeidegi jańa fýtbol stadionyn salý josparlanyp otyr. Jumys sapary barysynda qala ákimi Darhan Satybaldy jobamen tanysty,- dep habarlaidy Dalanews.kz
Jobalaýshylardyń málimetinshe, stadion 35 myń kórermenge eseptelip, ÝEFA-nyń 4-sanat talaptaryna sai bolady. Jobada jattyǵý bazalary, jankúierlerge arnalǵan demalys aimaqtary, zamanaýi qaýipsizdik júiesi jáne irgeles aýmaqty abattandyrý qarastyrylǵan.
Almaty ákimi jobany iske asyrý qalalyq infraqurylymdy damytýda mańyzdy qadam ekenin atap ótti. Halqy 2 millionnan asatyn elimizdiń eń iri megapolisi ósip keledi, turǵyndardyń, ásirese jastar men stýdentterdiń sport pen salaýatty ómir saltyna qyzyǵýshylyǵy kúnnen-kúnge artyp otyr. Osy oraida halyqaralyq deńgeidegi zamanaýi arenanyń salýdyń mańyzy erekshe.
«Ózderińiz bilesizder, Prezidenttiń tapsyrmasy boiynsha jumysty jedeldetýimiz qajet. Keler jyly qurylys-montaj jumystaryn bastaý kerek. Bolashaqta bul jerde metro beketin jáne Almatynyń logistikalyq habyn salý josparlanǵan», – dedi qala ákimi Darhan Satybaldy.
Jańa stadiondy Qulja tas joly men Talǵar tas jolynyń arasynda salý josparlanǵan. Joba júzege asatyn aýmaqtyń kólemi shamamen 15 gektar. Bul jer qalanyń mańyzdy kólik-logistikalyq torabyna ainalyp, arenany qalalyq infraqurylymǵa tiimdi kiriktirýge múmkindik beredi. Mundai sheshim kórermender men qonaqtarǵa yńǵaily bolýy úshin iri sport nysandaryn kólik habtarynyń mańyna ornalastyrý jónindegi álemdik tájiribege sai keledi.
Jobany tanystyrý kezinde qala ákimi kólik qoljetimdiligin qamtamasyz etý, avtoturaq oryndaryn uiymdastyrý jáne nysandy qalalyq ortaǵa qosý máselelerin pysyqtaýdy tapsyrdy. Sondai-aq, Darhan Satybaldy 65 jyldan astam buryn salynǵan Ortalyq stadion saqtalyp, jeńil atletika infraqurylymy eskerile otyryp jańǵyrtylatynyn, ári qarai da Almatydaǵy sport tarihynyń bir parasy bolyp qala beretinin aitty.
