Almatyda 2025 jyly 1200-ge jýyq qarańǵy ýchaske jaryqtandyrylady. Bul ótken jylmen salystyrǵanda 10 ese kóp. Bul týraly «Almaty Qala Jaryq» memlekettik kommýnaldyq kásipornynyń direktory Igor Mysik málimdedi,- dep habarlaidy Dalanews.kz
«Almaty ákimi Erbolat Dosaevtyń tapsyrmasymen úsh kezeńnen turatyn jospar ázirlendi. Birinshi kezeń – burynnan bar jaryq jelilerin qalpyna keltirý bolatyn. Qazir bul jumystar tolyǵymen aiaqtalýǵa jaqyn: barlyq qoldanystaǵy jeli iske qosylyp, tehnikalyq qyzmet kórsetilip otyr. 2024 jyldyń qańtarynan bastap «Almaty Qala Jaryq» mindetin tolyq kólemde atqara bastaǵaly beri qalada 45 myń sham aýystyryldy, 3 myńnan astam jańa baǵan ornatyldy, shamamen 500 shaqyrym kabel jelisi tartyldy.
Ekinshi kezeń aiasynda 2024 jyly jaryqsyz qalǵan 120 ýchaske jaryqtandyryldy. Al 2025 jyly 1200-ge jýyq qarańǵy kóshe jaryqpen qamtamasyz etiledi – bul ótken jylmen salystyrǵanda 10 ese kóp», – dedi Igor Mysik.
Úshinshi kezeńde jaryq júiesin avtomattandyrý kózdelgen. 2025 jyldyń ózinde syrtqy jaryqtandyrýdy basqarýǵa arnalǵan 320 syrtqy jaryqtandyrýdy basqarý shkafy aýystyryldy. Jyl sońyna deiin olardyń jalpy sanynyń 70%-y, iaǵni 1100 shkaftyń 800-i jańartylady.
Eske sala keteiik, 2024 jyldyń qańtarynan bastap qaladaǵy jaryqtandyrý jelileriniń basym bóligin «Almaty Qala Jaryq» basqarýda. Buǵan deiin bul jeliler memlekettik-jekemenshik áriptestik aiasynda úsh kompaniiadan turatyn konsortsiýmnyń qaraýynda bolǵan, alaida mindetin tiisinshe atqara almaǵandyqtan, 2023 jyldyń jazynda qala ákimi Erbolat Dosaev kelisimdi buzyp, barlyq infraqurylymdy aýdan ákimdikteriniń balansyna berýdi tapsyrǵan edi. Qazirgi tańda bul jelilerdiń barlyǵy «Almaty Qala Jaryq» mekemesimen kelisimshart negizinde qyzmet kórsetilýde.
