Almatyda qoǵamdyq kólik júiesin damytý jáne ekologiialyq ahýaldy jaqsartý aiasynda qala avtobýstary jańartylyp jatyr. «City Bus» jekemenshik avtoparki «Skywell» markaly elektr avtobýstaryn satyp aldy. Bul jóninde Almaty qalasynyń mobildilik basqarmasy málimdedi,- dep habarlaidy Dalanews.kz
Jolaýshylar tasymaldaýǵa arnalǵan bul tómen edendi, keń syiymdylyqty elektr avtobýstar bir qýatpen 400 shaqyrymǵa deiin júre alady. Olar dybyssyz qozǵalady, beinebaqylaý kameralary, konditsioner, USB-qýattaǵysh porttary, júrgizýshini baqylaý júiesi jáne ózge de zamanaýi júielermen jabdyqtalǵan.
Jańa avtobýstar 2025 jyly 22 maýsymnan bastap №19 baǵyt boiynsha, iaǵni «Nurkent turǵyn úi kesheni – Almaty kóshesi» aralyǵynda jolaýshy tasymaldai bastaidy. Sonymen qatar bul baǵyttaǵy jolǵa shyǵatyn avtobýstar sany 16-dan 18-ge deiin arttyrylmaq.
Aita keterligi, 2024 jyly Almatynyń mobildilik basqarmasy 600 gazben júretin avtobýs, 112 trolleibýs jáne 100 elektr avtobýsyn satyp alǵan bolatyn. Buǵan qosa, qala ishinde 3 jańa jáne qala mańyna 20 baǵyt ashyldy.
2025 jyly ákimdik taǵy 600 gazben júretin avtobýs satyp alýdy kózdep otyr. Al jekemenshik tasymaldaýshylar taǵy 118 elektr avtobýs satyp alýdy josparlaǵan.
