Almaty qalasynda aýqymdy igi ister marafony óz máresine jetti. Halyqaralyq eriktiler kúnine orai uiymdastyrylǵan bul shara Almaty qalasynyń eriktiler front-ofisiniń bastamasymen jáne Jastar saiasaty basqarmasynyń qoldaýymen ótti, – dep habarlaidy Dalanews.kz Almaty qalasy ákiminiń baspasóz qyzmetine silteme jasap.
Igi ister marafony aiasynda 4–9 jeltoqsan aralyǵynda 20-dan astam shara uiymdastyryldy. Olardyń qatarynda balalar úilerindegi tárbielenýshilerge qoldaý kórsetý, qarttar úiindegi qaiyrymdylyq kontsert, ekologiialyq sheberlik sabaqtary jáne bilim berý men áleýmettik bastamalar bar.
Almaty qalasy volonterler front-ofisynyń málimetinshe, Almaty – tek Qazaqstannyń ekonomikalyq jáne mádeni ortalyǵy ǵana emes, sonymen qatar volonterlik qyzmettiń aldyńǵy shebinde turǵan qala.
Búgingi tańda qalada 30-dan astam iri eriktiler uiymy jumys isteidi, olardyń quramynda 50 000-nan astam adam bar. Biyldyń ózinde almatylyq eriktiler 800-den astam aktsiia ótkizip, muqtaj jandarǵa kómek kórsetý, qarttardy qoldaý, ekologiialyq bastamalar men áleýmettik jobalardy júzege asyrý baǵyttarynda belsendilik tanytty.
Uiymdastyrýshylar jastar arasynda volonterlikti nasihattaýǵa erekshe nazar aýdarǵan. Marafon aiasynda ótken sharalardyń biri – áleýmettik jaýapkershilikti qalyptastyrýǵa baǵyttalǵan aktsiialar boldy. Mysaly, «Narkostop» jobasy aiasynda eriktiler qala ǵimarattarynyń betindegi esirtki jarnamalaryn óshirdi. Al «Oz ortana Qamqor bol» chellendji barysynda eriktiler kommýnaldyq qyzmetkerlerge ystyq shai taratyp, olardyń jumysyna qoldaý kórsetti.
Óz kezeginde kommýnaldyq qyzmetkerler belsendi jastarǵa alǵystaryn aityp, rizashylyqtaryn bildirdi
– Kún sýyqta kishkene denemizdi jylytyp, kóńilimizdi kóterip ketip jatqan volonterlarǵa kóp raqmet aitamyz. Osynyń ózi kúsh beredi, – dedi kommýnaldyq qyzmetkerlerdiń biri.
Igi ister marafony belsendi eriktilerdi marapattaý rásimimen aiaqtaldy. Bul sharada jyl boiy qalamyzdyń qoǵamdyq ómirine belsene qatysqan volonterlerge alǵys hattar men estelik syilyqtar tabystaldy. Bul marapattar olardyń Almatynyń damýyna qosqan baǵa jetpes úlesiniń belgisi retinde berildi.
Aita keteiik, atalmysh qaiyrymdylyq aktsiiasy qalamyzda turaqty túrde ótkizilip turady.
