Parijdegi Halyqaralyq saýda palatasy janyndaǵy Halyqaralyq tórelik soty Almaty – Qorǵas jolyn salý isi boiynsha Qazaqstannyń paidasyna sai oń sheshim shyǵardy. Bul týraly búgin QR Ádilet ministrligi habarlady, dep jazady Dalanews.kz.
"2020 jylǵy 15 mamyrdaǵy "Todini Impregilo Kazakhdorstroy" birlesken kásiporyn sheńberinde jumys isteitin Todini Costruzioni Generali S.p.A., WeBuild S.p.A. jáne "Kazahdorstroi" JShS kompaniialarynan turatyn birlesken kásiporyn Halyqaralyq saýda palatasy (ICC) janyndaǵy Halyqaralyq tórelik sotqa júginip, Qazaqstan Respýblikasyndaǵy Almaty – Qorǵas avtojolyn salý jobasy boiynsha daýlarǵa bailanysty QR Indýstriia jáne infraqurylymdyq damý ministrliginiń Avtomobil joldary komitetine qarsy tórelikpen aryzdandy", delingen habarlamada.
Isti qaraý sheńberinde sheteldik kompaniia Avtomobil joldary komiteti ústinen qurylys merzimderin uzartýǵa, kedendik bajdar men salyqtardy tóleýge, teńgeniń infliatsiiasyna, qunynyń ózgerýine, sý ótkizgish trýbalardy qaita toltyrýǵa, jol paidalaný pýnktiniń qurylysyn toqtatýǵa jáne qarjylyq shyǵyndarǵa bailanysty shyǵystardy qosa alǵanda, jalpy somasy shamamen 50 million AQSh dollary kóleminde shaǵym túsirdi.
2025 jylǵy 14 sáýirde Parijdegi ICC Halyqaralyq tórelik sotynda qurylǵan tribýnal Avtomobil joldary komiteti paidasyna túpkilikti sheshim shyǵardy. Sheteldik kompaniianyń barlyq talaptary tolyǵymen qabyldanbady.
Sonymen qatar, tribýnal qazaqstandyq Avtomobil joldary komitetiniń qarsy talabyn qanaǵattandyryp, sheteldik kompaniiaǵa jumys merzimin uzartqany úshin ótemaqy retinde buryn tólengen somany qaitarýǵa mindettedi.
"Osy isti Avtomobil joldary komitetiniń ókildigi men múddelerin qorǵaýdy Qazaqstan Respýblikasynyń Ádilet ministrligi júzege asyrdy. Konsýltant retinde Curtis, Mallet-Prevost, Colt & Mosle LLP halyqaralyq zań firmasy tartyldy", delingen habarlamada.
