Jaz mezgili kópshilik úshin demalyspen bailanysty bolǵanymen, memleket basshylary úshin bul kezeń de qarbalas jumystyń bir bóligi bolyp qala beredi. Olar memlekettik mindetterin atqara otyryp, tyǵyz jumys kestesiniń arasynda ǵana az ýaqyt tynyǵýǵa múmkindik tabady.
Zakon.kz álem kóshbasshylarynyń qalai demalatynyna, kúsh-qýatyn qalai qalpyna keltiretinine jáne Qazaqstan Prezidenti Qasym-Jomart Toqaevtyń jaz mezgilin qalai ótkizetinine nazar aýdardy, dep habarlaidy dalanews.kz.
Jyldyń eń ystyq úsh aiy ádette demalys maýsymy sanalady. Bul ýaqytta adamdar kúndelikti tirshiliktiń qarbalasynan bir sátke alystap, ortasyn aýystyryp, otbasymen kóbirek ýaqyt ótkizýge, sportpen ainalysýǵa, tabiǵat aiasynda tynyǵyp, jańa eńbek maýsymyna deiin kúsh jinaýǵa tyrysady.
Degenmen memleket basshylary úshin uzaq merzimdi, alańsyz demalys - sirek kezdesetin jait. Jaz ailarynda da olar halyqaralyq ahýaldy jiti baqylap, mańyzdy kezdesýler ótkizip, el taǵdyryna qatysty sheshimder qabyldaidy. Soǵan qaramastan olardyń da jumys qarbalasynan bir sátke bolsa da boi sergitip, kúsh-qýatyn qalpyna keltiretin jeke ýaqyty bolady. Álem kóshbasshylarynyń árqaisysy ózin sergek ustap, jumysqa degen jigerin saqtaýǵa kómektesetin ózine tán tynyǵý tásilderin qalyptastyrǵan.
AQSh prezidenti Donald Tramp golf oinaǵandy unatady. Ol úshin bul tek sport qana emes, beiresmi kezdesýler ótkizetin qolaily orta. Frantsiia prezidenti Emmanýel Makron sportpen ainalysyp, serýendep, jazǵy prezidenttik rezidentsiiasy – Fort Bregansonda otbasymen ýaqyt ótkizgendi jón kóredi.
Úndistan premer-ministri Narendra Modi kóp jyldan beri kúndelikti ómir saltyn iogamen bailanystyryp keledi. Resei prezidenti Vladimir Pýtin kópshilikke tabiǵat aiasyndaǵy demalysymen, balyq aýlaýymen jáne Sibirge saparlarymen tanymal. Al Qytai tóraǵasy Si Tszinpin jeke ómirin kópshilikke kórsete bermeidi. Degenmen onyń beinesi qatań tártippen, kitap oqýmen jáne kún tártibin buljytpai saqtaýmen astasady.
Osy turǵydan alǵanda Qazaqstan Prezidenti Qasym-Jomart Toqaevtyń jaz mezgilin qalai ótkizetini de kópshiliktiń qyzyǵýshylyǵyn týdyrady. Kópshilik siiaqty memleket basshysy jumystan tolyqtai qol úzip, memlekettik máselelerdi keiinge ysyryp, birneshe aptasyn tek demalysqa arnai almaidy. Jazda da onyń jumys kestesi ádettegidei qarbalas: óńirlerge saparlar, kezdesýler, jumys keńesteri men mańyzdy is-sharalar bir sátke de toqtamaidy. Sondyqtan Prezident úshin kúsh-qýatty qalpyna keltirý uzaq ýaqytqa demalysqa shyǵýmen ólshenbeidi. Onyń ornyna tabiǵat aiasynda bolyp, kúndelikti jumys yrǵaǵyn az ýaqytqa bolsa da ózgertý nemese ózine unaityn isterge kóńil bólý arqyly sergip, jańa kúsh jinaýǵa múmkindik alady.
Tabiǵat aiasyndaǵy tynyǵý jáne jumys yrǵaǵyn ózgertý
Memleket basshylary úshin demalys árdaiym jumystan tolyq qol úzý degendi bildirmeidi. Kóp jaǵdaida bul – kúndelikti jumys yrǵaǵyn ózgertip, kabinetten shyǵyp, tabiǵat aiasynda bolyp, taza aýamen tynystap, qozǵalys arqyly serpilip, kúsh-qýat jinaý.
Qasym-Jomart Toqaevtyń tabiǵatqa jaqyndyǵy onyń óńirlerge jasaǵan jumys saparlarynan da ańǵarylady. Prezident el aimaqtaryn jii aralaidy. Al múmkindik týǵan sátte Qazaqstannyń eń kórikti óńirleriniń biri sanalatyn Býrabai men Shýchinsk sekildi kólderi, qalyń ormany men keń dalasy úilesken tabiǵaty erekshe aimaqtarǵa barǵandy qup kóredi. Mundai oryndar oǵan jumys qarqynynan uzap ketpei-aq, qala tirshiliginen az ýaqytqa bolsa da alystap, sergip qaitýǵa múmkindik beredi.
Osy turǵydan alǵanda Prezidenttiń Shýchinskige sapary da erekshe mánge ie. Bul óńir tabiǵatymen ǵana emes, damyǵan sporttyq infraqurylymymen, saýyqtyrý ortalyqtarymen jáne jazǵy demalys oryndarymen keńinen tanymal. Kólderi, qylqan japyraqty ormandary, taza aýasy men tynysh tabiǵaty bul aimaqty kúsh-qýatty qalpyna keltirýge qolaily mekenderdiń birine ainaldyrǵan.
Árine, Prezident úshin bul eń aldymen jumys sapary boldy. Onyń aiasynda Qasym-Jomart Toqaev qoǵamdyq keńistikterdi, sport nysandaryn, Shoqan Ýálihanov atyndaǵy áskeri kolledjdi aralap, halyqaralyq «Aibyn» áskeri-patriottyq jastar jiynyna qatysty.
Soǵan qaramastan Shýchinsk tabiǵaty Qazaqstandaǵy jazǵy tynyǵý mádenietiniń ereksheligin de aiqyn kórsetedi. Bul – tabiǵatpen úndesý, belsendi ómir saltyn ustaný, sportpen ainalysý jáne ashyq keńistikte serpin alý.
Mundai tepe-teńdik memleket basshysy úshin asa mańyzdy. Óitkeni Prezidenttiń memlekettik isterden tolyqtai qol úzýi múmkin emes. Sondyqtan ortany aýystyrý, tabiǵat aiasynda tynyǵyp, el azamattarymen júzdesý - onyń sergektigin saqtap, jańa kúsh jinaýyna yqpal etetin mańyzdy faktorlardyń biri.
Sport jáne sergek ómir salty
Qazirgi zamanǵy kóshbasshy joǵary jumys qarqynyna tótep bere alýy kerek. Sondyqtan jaqsy fizikalyq daiyndyq, ózin-ózi tártipke baǵyndyrý jáne kez kelgen jaǵdaida jinaqylyqty saqtai bilý – tek jeke qasiet qana emes, zamanaýi kóshbasshynyń mańyzdy sipatyna ainaldy.
Qasym-Jomart Toqaevtyń ómir saltynda bul ustanym artyq jariialylyqtan emes, tabiǵi bolmysynan kórinedi. Prezident sportty kópshilikke kórsetý quraly retinde paidalanbaidy. Soǵan qaramastan onyń dene shynyqtyrý men salaýatty ómir saltyna erekshe kóńil bóletini jumys saparlarynan anyq baiqalady. Máselen, Shýchinskige barǵan kezinde Memleket basshysy ústel tennisi, júzý, jattyǵý zaldary jáne basqa da sport túrlerimen ainalysýǵa múmkindik beretin Burabay Arena sport kesheniniń jumysymen tanysty.
Bul sapar sport nysanyn aralaýmen ǵana shektelgen joq. Munda dene belsendiligi halyqtyń densaýlyǵyn nyǵaitý, tártipti qalyptastyrý, belsendi ómir saltyn dáripteý jáne sapaly ómir súrý ortasyn damytý siiaqty mańyzdy qundylyqtarmen ushtasady. Bul baǵyt Qazaqstanda sportty tek joǵary jetistikterdiń kórsetkishi retinde emes, árbir azamattyń kúndelikti ómiriniń ajyramas bóligi retinde damytýǵa negizdelgen memlekettik saiasatpen de tolyq úndesedi.
Prezidenttiń jeke beinesi turǵysynan da mundai sátterdiń ózindik máni bar. Onyń kópshilik aldyndaǵy júris-turysynan jinaqylyq, baiyptylyq pen senimdilik ańǵarylady. Túrli pikirler men boljamdarǵa qaramastan, Qasym-Jomart Toqaevtyń óńirlerdi aralap, halyqpen kezdesip, jastar aldynda sóz sóilep, belsendi jumys yrǵaǵyn saqtap kele jatqany anyq baiqalady.
Jylqyǵa degen erekshe yqylas
Qasym-Jomart Toqaevtyń kópshilikke belgili qyzyǵýshylyqtarynyń biri – jylqyǵa degen erekshe yqylasy. Qazaq halqy úshin tulpar – erkindiktiń, tektiliktiń jáne ulttyq dástúrdiń airyqsha simvoly. Prezidenttiń at qorasynda ahalteke tuqymyndaǵy Aqjan men Aqniet, sondai-aq Katar memleketi syiǵa tartqan arab sáigúlikteri baptalady. Belgili bolǵandai, Memleket basshysy keide at qoraǵa arnaiy baryp, jylqylardy óz qolymen jemdep turady.
Bul – resmi is-sharanyń nemese hattamanyń bir bóligi emes, qarbalas jumys arasynda az ýaqytqa bolsa da tynyǵyp, oi sergitýdiń ózindik tásili. Jylqymen jumys isteý adamnan sabyrlylyqty, uqyptylyqty jáne tózimdilikti talap etedi. Sondyqtan bul áýestik Prezidenttiń baisaldy bolmysymen, ustamdy minezimen jáne ulttyq qundylyqtarǵa degen qurmetimen tabiǵi úilesim tabady.
Jaz – jumystan qol úzý emes
Memleket basshysynyń tynyǵýy qarapaiym adamdardyń demalysynan ózgeshe. Prezident úshin telefondy sóndirip, barlyq kezdesýdi keiinge qaldyryp nemese aqparattyq keńistikten tolyqtai alystaý múmkin emes. Degenmen bul onyń da kúsh-qýatyn qalpyna keltirýge muqtaj emestigin bildirmeidi. Tek joǵary laýazymdy tulǵalardyń demalysy ózindik ereksheligimen sipattalady.
Qasym-Jomart Toqaev úshin tabiǵat aiasynda bolý, sportpen ainalysý, qalypty ómir yrǵaǵyn saqtaý, ulttyq dástúrdi dáripteý jáne elmen etene bailanysta júrý – sergektik pen kúsh-qýattyń mańyzdy kózderiniń biri. Munda artyq ásireleý de, jasandylyq ta joq. Kerisinshe, bul ómir salty qarapaiymdylyǵymen, ustamdylyǵymen jáne qazaqy bolmysqa jaqyndyǵymen erekshelenedi.
Osy turǵydan qaraǵanda Prezidenttiń jazy – jumystan qol úzip, qoǵamnan oqshaýlanatyn kezeń emes. Bul – memlekettik jaýapkershilik pen kúsh-qýatty saqtaýdyń arasyndaǵy úilesimdi taba bilý. Memleket basshysy qoǵamdyq ómirdiń bel ortasynda qalyp, óńirlerge saparlaryn, halyqpen kezdesýlerin jalǵastyrady. Sonymen birge tynyǵýdyń mindetti túrde uzaq demalys nemese kópshilikke kórsetiletin erekshe oqiǵa bolýy shart emes ekenin de kórsetedi.
Mundai ustanym qazirgi zamanǵy kóshbasshynyń bolmysyna tolyq sai keledi. Sebebi naǵyz kóshbasshy úshin demalysyn jariia etý emes, qandai jaǵdaida da sergek qalpyn, aiqyn oiyn, sabyrly minezin jáne joǵary jumys qarqynyn saqtai bilý mańyzdy. Sondyqtan memleket basshylarynyń qalai tynyǵatyny týraly suraqtyń jaýaby da osydan kórinedi: olar el isinen qol úzbei-aq, ózine qýat beretin dúnieler arqyly kúsh jinap, jumys yrǵaǵyn saqtaidy.
