Almaty qalalyq Qoǵamdyq keńesiniń jańa quramy bekitilip, kópshiliktiń nazaryna usynyldy. Bul joly keńestiń quramy ádettegi formalızm alshaqtap, kásibı, mazmundy baǵytqa bet burǵany anyq baıqalady. Keńestegi oryndardyń 74,4 paıyzy jańaryp, jańa kózqaras ıelerimen tolyqty.
Burynǵy tájirıbeli keńes músheleri men jańa tulǵalar qatar kelgen bul quram – azamattyq qoǵam men bılik arasyndaǵy qatynastyń jańa paraǵyn ashýǵa bekinip turǵany kórinip tur.
Keńes múshesi músheleri mundaı qurylymdyq jańarý – ótken shaqtaǵy bastamalardy saqtaı otyryp, ony jańasha qarqynmen jalǵastyrýdyń múmkindik beretinin alǵa tartty.
Jańa keńestiń qalyptasý prosesi de nazar aýdararlyq. Barlyq suhbattar ashyq túrde júrgizilip, Almaty qalasy máslıhatynyń YouTube-arnasynda tikeleı efırde kórsetildi. Bul – ashyqtyq pen esep berýdiń naǵyz úlgisi. Iaǵnı, bul joly Qoǵamdyq keńestiń quramy kóleńkeli kýlýarlyq kelisimdermen emes, ashyq báseke men aıqyn ustanym negizinde qalyptasty desek bolady.
Endi Qoǵamdyq keńeske burynǵydaı tanymal ánshi ne telejúrgizýshi bolý jetkiliksiz. Bul joly keńeske múshelikke ótý úshin qoǵamda shynaıy bedeliń, salalyq bilimiń men tájirıbeń bolýy shart. Osy turǵydan alǵanda, keńes tek keńesip qana qoıma, sheshim qabyldaýǵa áser ete alatyn platformaǵa aınalýda.
Qoǵamdyq keńes – tek ákimdikke usynys aıtyp otyratyn uıym emes, bul – halyqtyń tynys-tirshiligine áser etetin shynaıy alań. Ol arqyly el únin bılikke jetkizýge bolady, naqty ózgeristerge yqpal etýge bolady. Sondyqtan keńeske kelgen ár adamnyń sapasy – keńestiń yqpalyn aıqyndaıdy.
Búgingi tańda Almaty – eldegi áleýmettik-saıası temperatýrany ólsheıtin mańyzdy megapolıs. Mundaǵy qoǵamdyq keńestiń quramy – elimizdegi azamattyq qoǵamnyń qaı baǵytta damyp jatqanyn da kórsetetin ındıkator. Eger bul keńes shyn máninde kásibı ári batyl bolsa, onda ol búkil elge úlgi bolary sózsiz.
Almaty qalasynyń Qoǵamdyq keńesi «ataqty adamnyń» emes, «aqyl aıtatyn adamnyń» alańyna aınalǵany qýantady. Bul – júıelik ózgeristerge jol ashatyn, shynaıy dıalog pen naqty iske bastaıtyn qadam. Endi keńes múshelerinen kásibı ún, salmaqty syn jáne naqty usynys kútý – qoǵamnyń óz quqyǵy.
