الماتى قالالىق قوعامدىق كەڭەسىنىڭ جاڭا قۇرامى بەكىتىلىپ، كوپشىلىكتىڭ نازارىنا ۇسىنىلدى. بۇل جولى كەڭەستىڭ قۇرامى ادەتتەگى فورماليزم الشاقتاپ، كاسىبي، مازمۇندى باعىتقا بەت بۇرعانى انىق بايقالادى. كەڭەستەگى ورىنداردىڭ 74،4 پايىزى جاڭارىپ، جاڭا كوزقاراس يەلەرىمەن تولىقتى.
بۇرىنعى تاجىريبەلى كەڭەس مۇشەلەرى مەن جاڭا تۇلعالار قاتار كەلگەن بۇل قۇرام – ازاماتتىق قوعام مەن بيلىك اراسىنداعى قاتىناستىڭ جاڭا پاراعىن اشۋعا بەكىنىپ تۇرعانى كورىنىپ تۇر.
كەڭەس مۇشەسى مۇشەلەرى مۇنداي قۇرىلىمدىق جاڭارۋ – وتكەن شاقتاعى باستامالاردى ساقتاي وتىرىپ، ونى جاڭاشا قارقىنمەن جالعاستىرۋدىڭ مۇمكىندىك بەرەتىنىن العا تارتتى.
جاڭا كەڭەستىڭ قالىپتاسۋ پروسەسى دە نازار اۋدارارلىق. بارلىق سۇحباتتار اشىق تۇردە جۇرگىزىلىپ، الماتى قالاسى ءماسليحاتىنىڭ YouTube-ارناسىندا تىكەلەي ەفيردە كورسەتىلدى. بۇل – اشىقتىق پەن ەسەپ بەرۋدىڭ ناعىز ۇلگىسى. ياعني، بۇل جولى قوعامدىق كەڭەستىڭ قۇرامى كولەڭكەلى كۋلۋارلىق كەلىسىمدەرمەن ەمەس، اشىق باسەكە مەن ايقىن ۇستانىم نەگىزىندە قالىپتاستى دەسەك بولادى.
ەندى قوعامدىق كەڭەسكە بۇرىنعىداي تانىمال ءانشى نە تەلەجۇرگىزۋشى بولۋ جەتكىلىكسىز. بۇل جولى كەڭەسكە مۇشەلىككە ءوتۋ ءۇشىن قوعامدا شىنايى بەدەلىڭ، سالالىق ءبىلىمىڭ مەن تاجىريبەڭ بولۋى شارت. وسى تۇرعىدان العاندا، كەڭەس تەك كەڭەسىپ قانا قويما، شەشىم قابىلداۋعا اسەر ەتە الاتىن پلاتفورماعا اينالۋدا.
قوعامدىق كەڭەس – تەك اكىمدىككە ۇسىنىس ايتىپ وتىراتىن ۇيىم ەمەس، بۇل – حالىقتىڭ تىنىس-تىرشىلىگىنە اسەر ەتەتىن شىنايى الاڭ. ول ارقىلى ەل ءۇنىن بيلىككە جەتكىزۋگە بولادى، ناقتى وزگەرىستەرگە ىقپال ەتۋگە بولادى. سوندىقتان كەڭەسكە كەلگەن ءار ادامنىڭ ساپاسى – كەڭەستىڭ ىقپالىن ايقىندايدى.
بۇگىنگى تاڭدا الماتى – ەلدەگى الەۋمەتتىك-ساياسي تەمپەراتۋرانى ولشەيتىن ماڭىزدى مەگاپوليس. مۇنداعى قوعامدىق كەڭەستىڭ قۇرامى – ەلىمىزدەگى ازاماتتىق قوعامنىڭ قاي باعىتتا دامىپ جاتقانىن دا كورسەتەتىن ينديكاتور. ەگەر بۇل كەڭەس شىن مانىندە كاسىبي ءارى باتىل بولسا، وندا ول بۇكىل ەلگە ۇلگى بولارى ءسوزسىز.
الماتى قالاسىنىڭ قوعامدىق كەڭەسى «اتاقتى ادامنىڭ» ەمەس، «اقىل ايتاتىن ادامنىڭ» الاڭىنا اينالعانى قۋانتادى. بۇل – جۇيەلىك وزگەرىستەرگە جول اشاتىن، شىنايى ديالوگ پەن ناقتى ىسكە باستايتىن قادام. ەندى كەڭەس مۇشەلەرىنەن كاسىبي ءۇن، سالماقتى سىن جانە ناقتى ۇسىنىس كۇتۋ – قوعامنىڭ ءوز قۇقىعى.
