Almaty búkil álem gýrmandary úshin tartymdy mekenge ainalyp keledi. Qala saiahatshylardy kýlinarlyq dástúrlerdiń biregei úilesimimen, erekshe dastarhanymen jáne qarqyndy damyp jatqan meiramhana kásibimen qyzyqtyrady. Munda qazaqtyń dástúrli ulttyq taǵamdaryn da, túrli ulystardyń asyn da, sondai-aq, halyqaralyq taǵamdardyń avtorlyq jumysyn da tatyp kóresiz, dep habarlaidy Dalanews.kz
Alaida bul salanyń tanymaldyǵy artyp kele jatqanyna qaramastan, Almatyda gastronomiialyq baǵytta qyzmet kórsetetin gidter joqtyń qasy. Bul jaǵdai baǵytty damytýǵa úlken múmkindik beredi. Buǵan bailanysty Almaty Tourism Bureau Almatyny óńirdiń gastronomiialyq astanasy retinde damytý úshin arnaiy gastronomiialyq gid ázirledi.
Gidke 140-tan astam erekshe taǵamdar men dastarhan usynatyn mekemeler engen. Munda qalada gastronomiialyq tájiribe alýǵa arnalǵan baǵyttar, ideialar men stsenariiler qamtylǵan. Bul stsenariiler kásibi gidter men taǵam salasyndaǵy sarapshylardyń qoldaýymen jasalǵan, sondyqtan týrister úshin umytylmas áser qaldyrýy sózsiz.
Gid birneshe taqyryptyq baǵytty qamtidy. «Klassikalyq týr» Almatynyń tarihyn taǵamdar arqyly tanystyrady. «Dástúrli gid» qazaq ulttyq taǵamdaryna tereń úńilýge múmkindik beredi. «Mýltimádeni gid» elimizdiń mádeni alýan túrli ekenin as máziri arqyly kórsetedi. «Taý men gastronomiia» baǵyty belsendi demalysta tatyp kórýge turarlyq dám toptasyn usynady. Sonymen qatar, «Instagrambl-marshrýt» kórkem lokatsiialardy, al Art&Eat kontseptýal ári ónerge baǵyttalǵan oryndardy tanystyrady.
Gid, sondai-aq, kóshe taǵamdary men barlarǵa arnalǵan baǵyttardy qamtidy. Budan bólek, Almatyǵa ǵana tán erekshe taǵamdar men sapardan estelik retinde alyp ketýge bolatyn azyq-túlik kádesyi tizimi de engizilgen.
Joba úsh tilde — qazaq, orys jáne aǵylshyn tilderinde daiyndalǵan, bul ony keń aýditoriia úshin qoljetimdi etedi. Gidtiń baspa nusqasy týristerge taratylmaq, al aǵylshyn tilindegi nusqasy shekaralyq baqylaý pýnktterinde jáne týristik aqparattyq ortalyqtarda qoljetimdi bolady.
Gidti jasaý – gastronomiialyq týrizmdi damytýdyń jańa kezeńi ǵana emes, sonymen qatar, Almatyny zamanaýi ári qonaqjai qala retinde tanytýdyń bir múmkindigi. Jobany ázirleýshilerdiń aitýynsha, basty nazar túsinikti qurylym men yńǵaily baǵyt-baǵdarǵa berilgen: jeńil oqylady, baǵyttar men mekemeler logikaǵa sai toptastyrylǵan.
Mekemelerdi tańdaý kezinde tanymaldyq deńgeii men reitingter ǵana emes, sondai-aq, olardyń atmosferasy, taǵam sapasy jáne biregei kontseptsiiasy eskerilgen. Gidte mekemeler sanattar men qalanyń ártúrli aýdandaryna qarai jiktelip, mekenjailary, jumys ýaqyty men bailanys derekteri kórsetilgen.
Birqatar mekeme 50 Best Discovery, The World's 50 Best Bars, Top-1000 Restaurants 2025 siiaqty halyqaralyq reitingterge engen. Almatynyń meiramhanalarynyń mundai tizimderge enýi onyń gastronomiialyq baǵyt retindegi mártebesin bekitip, jergilikti ashananyń halyqaralyq aýditoriiaǵa tanylýyna jol ashady.
Gastronomiialyq gidtiń elektron nusqasyn myna jerden júkteýge bolady.
