Almatyda ónerkásip óndirisiniń kólemi turaqty ósim kórsetip otyr. 2025 jyly qańtar-mamyr aralyǵynda óndirilgen ónim kólemi 976,2 mlrd teńgege jetti. Bul jóninde qalalyq kásipkerlik jáne investitsiialar basqarmasy málimdedi,- dep habarlaidy Dalanews.kz
Mashina jasaý salasynda eń úlken ósim baiqalǵan, óndiris kólemi 36,3% artyp, 366,1 mlrd teńgege jetti, oǵan óńdeýshi ónerkásiptiń jalpy kóleminiń 46,7%-y tiesili. Mashina jasaý qurylymynda negizgi úlesti (36,1%) kólik qurastyrý salasy ielenip otyr.
Ósim ózge de negizgi salalarda tirkeldi: basqa beimetall mineraldy ónimder óndirisi 25,6% artyp, 47 mlrd teńgege jetti, baspa isi 27,3% ósip, 25 mlrd teńge boldy. Farmatsevtika óndirisi 14,2% (11,2 mlrd teńge), kiim óndirisi 18,8% (3,7 mlrd teńge), aǵash buiymdary óndirisi 35,2% (3,4 mlrd teńge) ósti.
Qazirgi tańda Almatyda 144 iri jáne orta ónerkásiptik kásiporyn jumys isteidi. Deni Jetisý, Túrksib jáne Alataý aýdandarynda shoǵyrlanǵan.
Almatynyń Indýstriialyq aimaǵy men «Innovatsiialyq tehnologiialar parki» AEA qarqyndy damyp keledi. 2025 jyly Indýstriialyq aimaqta jalpy quny 135,4 milliard teńge bolatyn 11 jobany iske qosý josparlanǵan. Bul jobalar nátijesinde 4 myń jańa jumys orny ashylmaq. Al arnaiy ekonomikalyq aimaqta 18,5 milliard teńgeniń 6 jobasyn iske qosý jáne 415 jumys ornyn qurý kózdelgen.
Buǵan qosa, Almatyda búginde 1,5 myńnan astam adamdy jumyspen qamtyp otyrǵan 15 shaǵyn ónerkásiptik park jumys isteidi. 2027 jylǵa deiin jalpy aýdany 194 myń sharshy metr bolatyn taǵy 35 park salý josparlanǵan. Bul bastama aiasynda 21,8 milliard teńge investitsiia tartylyp, qosymsha 4,2 myńnan astam jumys orny ashylady.
