الماتىدا ونەركاسىپ ءوندىرىسىنىڭ كولەمى تۇراقتى ءوسىم كورسەتىپ وتىر. 2025 جىلى قاڭتار-مامىر ارالىعىندا وندىرىلگەن ءونىم كولەمى 976،2 ملرد تەڭگەگە جەتتى. بۇل جونىندە قالالىق كاسىپكەرلىك جانە ينۆەستيسيالار باسقارماسى مالىمدەدى،- دەپ حابارلايدى Dalanews.kz
ماشينا جاساۋ سالاسىندا ەڭ ۇلكەن ءوسىم بايقالعان، ءوندىرىس كولەمى 36،3% ارتىپ، 366،1 ملرد تەڭگەگە جەتتى، وعان وڭدەۋشى ونەركاسىپتىڭ جالپى كولەمىنىڭ 46،7%-ى تيەسىلى. ماشينا جاساۋ قۇرىلىمىندا نەگىزگى ۇلەستى (36،1%) كولىك قۇراستىرۋ سالاسى يەلەنىپ وتىر.
ءوسىم وزگە دە نەگىزگى سالالاردا تىركەلدى: باسقا بەيمەتالل مينەرالدى ونىمدەر ءوندىرىسى 25،6% ارتىپ، 47 ملرد تەڭگەگە جەتتى، باسپا ءىسى 27،3% ءوسىپ، 25 ملرد تەڭگە بولدى. فارماسيەۆتيكا ءوندىرىسى 14،2% (11،2 ملرد تەڭگە)، كيىم ءوندىرىسى 18،8% (3،7 ملرد تەڭگە)، اعاش بۇيىمدارى ءوندىرىسى 35،2% (3،4 ملرد تەڭگە) ءوستى.
قازىرگى تاڭدا الماتىدا 144 ءىرى جانە ورتا ونەركاسىپتىك كاسىپورىن جۇمىس ىستەيدى. دەنى جەتىسۋ، تۇركسىب جانە الاتاۋ اۋداندارىندا شوعىرلانعان.
الماتىنىڭ يندۋستريالىق ايماعى مەن «يننوۆاسيالىق تەحنولوگيالار پاركى» اەا قارقىندى دامىپ كەلەدى. 2025 جىلى يندۋستريالىق ايماقتا جالپى قۇنى 135،4 ميلليارد تەڭگە بولاتىن 11 جوبانى ىسكە قوسۋ جوسپارلانعان. بۇل جوبالار ناتيجەسىندە 4 مىڭ جاڭا جۇمىس ورنى اشىلماق. ال ارنايى ەكونوميكالىق ايماقتا 18،5 ميلليارد تەڭگەنىڭ 6 جوباسىن ىسكە قوسۋ جانە 415 جۇمىس ورنىن قۇرۋ كوزدەلگەن.
بۇعان قوسا، الماتىدا بۇگىندە 1،5 مىڭنان استام ادامدى جۇمىسپەن قامتىپ وتىرعان 15 شاعىن ونەركاسىپتىك پارك جۇمىس ىستەيدى. 2027 جىلعا دەيىن جالپى اۋدانى 194 مىڭ شارشى مەتر بولاتىن تاعى 35 پارك سالۋ جوسپارلانعان. بۇل باستاما اياسىندا 21،8 ميلليارد تەڭگە ينۆەستيسيا تارتىلىپ، قوسىمشا 4،2 مىڭنان استام جۇمىس ورنى اشىلادى.
