Almaty oblysy politsiia departamentine jańa basshy taǵaiyndaldy ári basqa da kadrlyq ózgerister boldy, dep habarlaidy Dalanews.kz.
"Ishki ister ministri Erjan Sádenov shuǵyl keńes ótkizip, oblystyq PD-nyń jańadan taǵaiyndalǵan basshysyn jeke quramǵa tanystyrdy. QR Prezidenti Ákimshiliginiń kelisimi boiynsha Ishki ister ministriniń buiryǵymen oblystyq politsiia departamentiniń bastyǵy bolyp Meiram Ábikeev taǵaiyndaldy. Politsiia polkovnigi buǵan deiin Soltústik Qazaqstan oblysy PD bastyǵynyń orynbasary bolǵan", delingen QR IIM baspasóz qyzmeti senbide taratqan habarlamasynda.
Oblystyq departament bastyǵynyń birinshi orynbasary bolyp Baǵdat Áshimov taǵaiyndaldy.
IIM basshysynyń buiryǵymen myna laýazymdy tulǵalar qyzmetinen bosatyldy:
- PD bastyǵynyń birinshi orynbasary Serik Shalharov;
- Talǵar aýdandyq politsiia basqarmasynyń bastyǵy Nurjan Kúntúnov;
- PD ekstremizmge qarsy is-qimyl basqarmasynyń bastyǵy Ulan Baitaqov;
- PD kriminaldyq politsiia basqarmasynyń bastyǵy Rýslan Smaǵulov;
- PD uiymdasqan qylmysqa qarsy kúres basqarmasynyń bastyǵy Dýlat Qaiyr jáne onyń orynbasary Janat Omarov.
Sonymen qatar, IIM basshysy Talǵar aýdanynda kámeletke tolmaǵan jasty óltirý isin tergeýshi jedel-tergeý tobynyń esebin tyńdady. Qorytyndysy boiynsha naqty tapsyrmalar berildi.
Buǵan deiin Memleket basshysy Ishki ister ministriniń birinshi orynbasary Marat Qojaevty qyzmetinen bosatyp, ony keiinnen senator etip taǵaiyndady. Sodan keiin Almaty oblysy prokýrorynyń orynbasary jáne Talǵar aýdanynyń prokýrory laýazymdarynan aiyrylǵany belgili boldy.
Aita ketsek, Talǵarda jasóspirim Sherzat Bolat 4 qazanǵa qaraǵan túni top adam qolynan qaza tapty. 10 kúdikti ustaldy. Almaty oblysy politsiia departamenti atalǵan fakti boiynsha qylmystyq is qozǵady. Odan keiin marqumnyń úiine kúzet qoiyldy.
Kóp uzamai marqum Sherzattyń úii órtengeni belgili boldy. Áleýmettik jelide oqiǵa bolǵan kúngi video jariialandy. Keiinnen oblystyq politsiia bul videoǵa taldaý jasady. Marqum balanyń ákesi Prezidentten kómek surap, Almaty oblysynan ketetinin aitty.
