Bul TMD aýmaǵynda teńdesi joq biregeı joba. Qazaqstanda alǵash ret qoldanysqa engizilgen júıe ekenin atap ótken jón. Atalǵan qosymsha Almaty oblysynyń 16 medısınalyq mekemesin kompúterlik, magnıttik-rezonanstyq tomografıa, rentgenografıa, mammografıany qosa alǵanda, oblys ortalyǵynda barlyq radıologıalyq zertteýlerdi ortalyqtandyrý múmkindigimen biryńǵaı radıologıalyq aqparattyq júıemen biriktirdi.
Joba Memleket basshysy belgilegen 4 negizgi mindetti sheshedi. Birinshi kezekte, erte dıagnostıka jasaý, ekinshiden, radıolog-dárigerlerdiń kadr tapshylyǵy máselesin sheshý, densaýlyq saqtaýdy sıfrlandyrý, sondaı-aq jasandy zerdeni paıdalana otyryp, ozyq ǵylymı jetistikterdi qoldaný.
Júıe Almaty oblysynyń 16 medısınalyq mekemesin, sondaı-aq Taldyqorǵan qalasyndaǵy Ortalyq kópsalaly aýrýhanany qamtıdy, onda joǵary ónimdi óndiristik serverleri bar derekterdi óńdeý ortalyǵy ornatylǵan, oǵan kún saıyn barlyq medısınalyq mekemelerdiń oryndalǵan rentgenologıalyq zertteýleri jınaqtalady.
Joba aıasynda medısınalyq mekemelerdegi barlyq Analogty rentgenologıalyq jabdyqtar arnaıy qurylǵynyń kómegimen sıfrlandyryldy.
Biregeı jobada sút bezi obyryn mashınalyq taný júıesi ornalastyrylǵan. Jáne de kompúterlik tomograftyń zertteýlerin kóretin dárigerlerge bir ýaqytta birneshe sýretti shyǵarý úshin ekrandy bólý múmkindigi bar túrli-tústi medısınalyq monıtorlar qoıylǵan. Sondaı-aq, mammografıalyq zertteýlerdi sıpattaıtyn dárigerge sýretti óńdeýdiń arnaıy algorıtmi bar arnaıy joǵary ajyratymdylyqtaǵy medısınalyq monıtorlar jetkizilgen.
Joba sheńberinde dárigerlerge ókpe jáne sút beziniń onkologıalyq aýrýlaryn erte satysynda anyqtaý boıynsha jumysty jeńildetetin jasandy ıntellekt júıesi engizildi.
– Búgingi tańda ókpe obyry men sút bezi obyry onkologıalyq aýrýlar qurylymynda keń taralǵan aýrýlardyń biri bolyp tabylady. Sondyqtan bul qaýipti aýrýlardy erte kezeńde dıagnostıkalaý óte mańyzdy, bul emdeýdi ýaqytynda bastaýǵa múmkindik beredi, – deıdi Almaty oblysy densaýlyq saqtaý basqarmasynyń basshysy Ómirzaq Nıazbekov.
Onkologıalyq aýrýlardy dıagnostıkalaý kezinde jasandy zerdeni qoldaný qazirdiń ózinde ókpe obyry men sút bezi obyryn erte satysynda anyqtaýdy 13%-dan 60%-ǵa deıin arttyrýdy qamtamasyz etti. Ádette, adamnyń kózi 5 mm ólshemdi isikterdi kóredi, al jasandy ıntellekt dárigerge 1 mm-den bastap isikterdi anyqtaýǵa kómektesedi.
