Qazaqstannyń tuńǵysh ǵaryshkeri, Halyq Qaharmany Toqtar Áýbákirov eks-prezident Nursultan Nazarbaevpen arada bolǵan ótkir áńgimeni eske aldy, dep dalanews.kz tilshisi Malim.kz saityna silteme jasap habarlaidy.
Ǵaryshkerdiń aitýynsha, ol kezinde Baiqońyr ǵarysh ailaǵyn Reseige jalǵa berý týraly sheshimmen kelispegen jáne bul pikirin sol kezdegi memleket basshysyna ashyq aitqan.
Áýbákirovtiń sózinshe, Kremlden qaityp kele jatqan sapar kezinde ol Nazarbaevqa endi onyń qaramaǵynda jumys istemeitinin málimdegen.
"Kremlden shyǵyp, ushaqpen ushyp kele jatqanymyzda men: "Endi qol astyńda jumys istemeimin", – dedim. Prezident qasyna shaqyryp, "shai isheiik" dedi. "Men sizben eshteńe ishpeimin, siz qazaqtyń jaýysyz" dedim. Birinshi aitqanym ushaqtyń ishinde boldy. Týra osylai aittym. Al ol maǵan "sen eshteńe de bilmeisiń, saiasattan habaryń joq, jas balasyń" dep jaýap berdi. "Meni bosatyńyz, men endi jumysqa barmaimyn" dep taǵy da aittym", – deidi Toqtar Áýbákirov.
Aita keteiik, Baiqońyr ǵarysh ailaǵy Qyzylorda oblysynda ornalasqan jáne álemdegi eń iri ǵarysh keshenderiniń biri sanalady. 1991 jyly Qazaqstan táýelsizdik alǵannan keiin nysan elimizdiń ieligine ótken. Alaida 1993 jyly Reseige jalǵa berilip, keiin kelisim merzimi 2050 jylǵa deiin uzartylǵan.
