Jeńis kúni qarsańynda Shyǵys Qazaqstan oblysynyń ákimi Nurymbet Saqtaǵanov ardagerler men tyl eńbekkerleriniń shańyraǵyna baryp, merekemen quttyqtady, dep habarlaidy dalanews.kz.
Aimaq basshysy olarǵa alǵys aityp, Qazaqstan Respýblikasy Prezidentiniń atynan arnaiy quttyqtaý hattaryn tabystap, el tarihynyń bir bólshegine ainalǵan jandarmen júzdesti.
Oblys ákimi barǵan jandardyń biri – tyl eńbekkeri Shaikamal Esqojinova. Ol 1936 jyly Kúrshim aýdanynyń Quiǵandy aýylynda dúniege kelgen. Balalyq shaǵy asharshylyq pen qiyn kezeńderge tuspa-tus kelip, erte eseigen. Joldasymen birge jeti bala tárbielep ósirgen. Búginde olardyń arasynda ustazdar men meditsina salasynyń mamandary bar. Shaikamal apa uzaq jyldar balyq zaýytynda eńbek etken. Qazir onyń basty bailyǵy – úlken áýleti. Ol 17 nemere, 25 shóbere súiip otyr. Ana eńbegi úshin «Altyn alqa» alqasymen marapattalǵan.
Sonymen qatar oblys ákimi Uly Otan soǵysynyń ardageri Mihail Iakovlevich Golovatiýktiń úiine bardy. 98 jastaǵy qariia búginde erlik pen qaisarlyqtyń simvolyna ainalǵan. Soǵys jyldary jasóspirim kezinde Irkýtskiden Baikalǵa deiingi taiga arqyly temirjol qurylysyna qatysqan. Keiin ásker qataryna shaqyrylyp, militaristik Japoniiaǵa qarsy Manchjýr operatsiiasyna qatysqan. Soǵystan keiin 30 jyldan astam ýaqyt qorǵasyn-myrysh kombinatynda balqytýshy bolyp eńbek etti. Eren eńbegi men jaýyngerlik erligi úshin orden-medaldarmen marapattalyp, «Qurmetti metallýrg» ataǵyna ie bolǵan.
Merekelik lebiz Uly Otan soǵysynyń ardageri Pavel Eremeevich Strehoǵa da arnaldy. Biyl ol 100 jasqa toldy. Onyń ómir joly – Otanǵa adal qyzmet etýdiń aiqyn úlgisi. Maidanǵa 17 jasynda attanyp, Kionigsbergti azat etý shaiqastaryna qatysqan. III dárejeli Dańq ordenimen, I dárejeli Otan soǵysy ordenimen jáne «Erligi úshin», «Germaniiany jeńgeni úshin», «Kionigsbergti alǵany úshin», «Japoniiany jeńgeni úshin» medaldarymen nagradtalǵan.
Kezdesý barysynda Nurymbet Saqtaǵanov Jeńis býynynyń erligi el tarihynda máńgi saqtalatynyn atap ótti.
"Biz Jeńis býynyna árdaiym taǵzym etemiz. Sizderdiń erlikterińiz ben tabandy eńbekterińizdiń arqasynda búgin beibit elde ómir súrip otyrmyz. Ardagerlerdiń ómir joly men estelikteri – keiingi urpaqqa amanat bolatyn asyl mura", — dedi oblys ákimi.
Ardagerler soǵys jáne soǵystan keiingi jyldardaǵy estelikterimen bólisip, bastan ótkergen qiyndyqtardy eske aldy. Sondai-aq búgingi kúni beibitshilik pen birliktiń qadirin saqtaý asa mańyzdy ekenin aitty.
