Eksporttyq áleýetti damytý – eldiń halyqaralyq naryqtardaǵy básekege qabilettiligin arttyrýǵa baǵyttalǵan strategiialyq mindetterdiń biri. Osyǵan orai, Almaty oblysynyń óńirlik damytý ortalyǵy men Qazaqstan Respýblikasynyń Eksporttaýshylar qaýymdastyǵy óńir kásipkerlerine arnalǵan arnaiy oqytý jáne biliktilikti arttyrý seminaryn ótkizdi,- dep habarlaidy Dalanews.kz
Seminardyń negizgi maqsaty – jergilikti taýar óndirýshilerdiń halyqaralyq naryqtardyń qazirgi zamanǵy talaptaryna beiimdelýine kómektesý jáne ónimderin shetelge tabysty eksporttaýǵa jaǵdai jasaý.
Eksporttaýshylar qaýymdastyǵynyń málimetinshe, búginde Qazaqstan eksporty jalpy taýar ainalymynyń 65,1%-yn quraidy, onyń basym bóligi mineraldy ónimder men metaldarǵa tiesili.
Seminar barysynda qatysýshylar halyqaralyq standarttardyń zamanaýi talaptary, ónimdi akkreditatsiialaý jáne sertifikattaý rásimderi, jetkizilimniń logistikalyq aspektileri men memlekettik qoldaý tetikteri boiynsha bilim aldy. Sonymen qatar, eksporttyq qyzmettegi salyq, kedendik rásimdeý jáne sheteldik naryqtarǵa shyǵýdaǵy táýekelderdi tómendetý máselelerine erekshe nazar aýdaryldy.
«Búginde eksporttyq qyzmet tek ónim sapasyn ǵana emes, sonymen qatar zańdyq jáne ekonomikalyq turǵydan saýatty júrgizýdi de talap etedi. Biz kásipkerlerge halyqaralyq naryqtarǵa shyǵýdyń tiimdi strategiialaryn meńgerýge, shyǵyndardy azaitýǵa jáne senimdi seriktester tabýǵa kómektesemiz», – dep atap ótti Qazaqstan Respýblikasynyń Eksporttaýshylar qaýymdastyǵynyń tóraiymy Gúlmira Iýsýpova.
Óz kezeginde, Almaty oblysynyń óńirlik damytý ortalyǵynyń eksportty damytý bóliminiń basshysy Nurtas Meldehan mundai seminarlardyń óńirdiń eksporttyq áleýetin damytýdaǵy mańyzdylyǵyn atap ótti.
«Kásipkerlerdiń biliktiligin arttyrý jáne zamanaýi tájiribelerdi engizý eksport kóleminiń ósýine ǵana emes, sonymen qatar qazaqstandyq ónimniń jahandyq naryqta básekege qabiletti bolýyna yqpal etedi. Biz, óz kezegimizde, Almaty oblysynyń taýar óndirýshilerine eksporttyq jetkizilimderdi uiymdastyrýda jan-jaqty qoldaý kórsetýge daiynbyz. Óńirlik damytý ortalyǵy eksporttaýshylarǵa sheteldik kompaniialarmen áriptestik ornatýǵa jáne halyqaralyq naryqtarǵa sátti shyǵýǵa belsendi túrde járdemdesýde», – dep qorytyndylady Nurtas Meldehan.
