Atyraý oblysynda tórt adamnyń ólimine qatysty qylmystyq is boiynsha sot otyrysy jalǵasyp jatyr. Bul is boiynsha Sultan Sársemáliev aiyptalýshy retinde jaýap berýde, dep habarlaidy dalanews.kz.
Kezekti sot otyrysynda birneshe kýágerden jaýap alyndy. Solardyń biri – Munaishy yqshamaýdanyndaǵy úiin Sársemálievtiń otbasyna jalǵa bergen azamat.
Kýágerdiń aitýynsha, Sársemálievtiń otbasy atalǵan baspanany 2023 jyldan bastap jaldap turǵan. Úidiń ai saiynǵy aqysy 50 myń teńge bolǵan. Aqsha bank arqyly belgisiz bir adamnyń atynan aýdarylyp otyrǵan. Alaida kýáger keibir ýaqytta otbasynyń bul úide turmaǵanyn da aitty.
Úi iesi sotta 2025 jylǵy 7 jeltoqsanda Sultan Sársemálievpen sóileskenin málimdedi. Onyń sózinshe, sol kezde aiyptalýshy áielin emdetip júrgenin aityp, endi úidi jaldamaitynyn jetkizgen.
Sot otyrysynda sýdia Zarema Hamidýllina kýágerdiń tergeý kezinde bergen jaýabyn oqyp berdi. Onda úi iesiniń jalǵa berilgen baspanaǵa tek qajet bolǵan jaǵdaida ǵana baryp turǵany aitylǵan.
Tergeýdegi jaýapqa sáikes, kýáger Sársemálievtiń áielin bir ret qana syrttai kórgen. Al balalaryn múlde kórmegenin jetkizgen.
"Áieli oramalda edi. Shamamen 27 jeltoqsanda úige baryp, esik aldyndaǵy tastyń astynda turǵan kiltterdi aldym. Úidiń ishin qaraǵanda shashylǵan zattar nemese daqtar baiqalmady. Úi tazalanyp ketken", – delingen kýágerdiń jaýabynda.
Sonymen birge úi iesi máiitti oraýǵa paidalanylǵan kilemniń ózine tiesili emes ekenin aitty. Onyń sózinshe, úi aýlasyndaǵy dýsh ishinde eki kúrek pen bir aiyr turǵan.
Qazirgi ýaqytta sot protsesi jalǵasyp jatyr. Istiń tolyq mán-jaiy sot barysynda anyqtalmaq.
