Jergilikti atqarýshy organdar, «Surbana Jurong» jáne Qazaqstandyq biznes tarapynan jobanyń bastamashysy «Caspian Group» arasyndaǵy ózara is-qimyldy jaqsartý boiynsha usynystar qaraldy.
«Surbana Jurong City Global» bas direktory atalǵan jobany iske asyrý búkil oblystyń damýyna serpin beretinin, sondai-aq Qazaqstan úshin sheteldik investorlardy tartý ortalyǵyna ainalýy múmkin ekenin atap ótti.
Sondai-aq, jergilikti biýdjetke júktemeni barynsha azaityp, injenerlik infraqurylym qurylysyna jetekshi halyqaralyq kompaniialardy tartý arqyly jobany iske asyrý múmkindikteri talqylandy.
Kelissózder aiasynda oblystaǵy jańa ákimshilik ortalyq pen áleýmettik-mádeni nysandardy aralady. Qonaev qalasynyń jan-jaqty damytý máseleleri boiynsha keńester ótkizildi.
Nina Ian Almaty oblysy men Qonaev qalasynyń bilim berý jáne meditsina, tranzit jáne logistika, týrizm men aýyl sharýashylyǵy ónimderin qaita óńdeý klasterin damytý úshin keń múmkindikterge ie ekendigine basa nazar aýdardy. Bul baǵyttar iri investorlardy qyzyqtyrýy múmkin.
Dialog barysynda jergilikti tabiǵatpen, mádenietpen, ekonomikamen jáne óńirdiń damý perspektivalarymen tanysý úshin qazan aiynda singapýrlyq kompaniialar tobynyń saparyn ótkizý týraly ýaǵdalastyqqa qol jetkizildi.
Esterińizge sala keteiik, 2021 jyldyń qyrkúieginde Memleket basshysy Qasym-Jomart Toqaev «Surbana Jurong» tobynyń bas direktory Vong Heang Faindy qabyldady. Prezidentke Kompaniianyń otandyq investorlarmen áriptestikte Almaty oblysynda jańa «G4 City» seriktes qalalaryn salý jónindegi josparlary týraly málimet usynylǵan bolatyn. Sol kezde arnaiy jospar daiyndaldy, qala qurylysy qujattaryn ázirleýdi, injenerlik jáne áleýmettik infraqurylymdy qalyptastyrýdy, qolaily investitsiialyq ahýal jasaýdy kózdeitin jobany iske asyrý boiynsha Jol kartasy ázirlendi.
Almaty oblysy ákiminiń Nina Ianmen kezdesýi buryn aitylǵan ýaǵdalastyqtardyń qisyndy jalǵasy desek bolady. Júrgizilgen kelissózderdiń nátijeleri Almaty oblysynyń, atap aitqanda Qonaev qalasynyń odan ári údemeli damýyna negiz bolatyny sózsiz.
Aita keteiik, Nina Ian hanym 2019 jyly SJCityGlobal kompaniiasynyń bas direktory boldy. Surbana Jurong-ǵa kelgenge deiin ol ascendas-Singbridge (ASB) turaqty qalalyq damý jónindegi bas direktor boldy, ASB-niń ýrbanizatsiia jobalaryna jáne sheteldegi negizgi ázirlemelerge investitsiialaryn basqarýǵa jaýap berdi. Ol basqarǵan áigili jobalar Qytai-Singapýr Bilim qalasy Gýanchjoý, Qytai-Singapýr innovatsiialyq parki Chendý, Qytai-Singapýr Ekologiialyq qalasy Tiantszin jáne Astanalyq Amaravati qalasy boldy. Sondyqtan Ian úkimetter arasyndaǵy yntymaqtastyqtyń kúrdeli jobalarymen tanys dep aitýǵa bolady.
