Almaty oblysynyń ákimi Marat Sultanǵaziev Jambyl aýdanynyń Ýlken aýylyna jumys saparymen bardy. Sapar barysynda óńir basshysy negizgi áleýmettik jáne infraqurylymdyq nysandardy aralap, jergilikti turǵyndarmen kezdesip, AES jobasyn júzege asyrýǵa bailanysty aýyldy damytý múmkindikterin talqylady,- dep habarlaidy Dalanews.kz
Sapardyń mańyzdy bóligi – Qazaqstandaǵy alǵashqy atom elektr stantsiiasyn salý josparlanǵan aýmaqpen tanysý boldy. Jambyl aýdanynyń ákimi Nurlan Ertastyń súiemeldeýimen óńir basshysy jer teliminiń sipattamalaryn zerttep, strategiialyq jobany iske asyrý perspektivalaryn talqylady.
AES qurylysy men onyń odan ári paidalanylýyn qajetti resýrstarmen jáne qyzmettermen qamtamasyz etý úshin oblys ákimi Indýstrialdy aimaq qurýdy tapsyrdy. Bul aimaq qosalqy jáne ilespe biznesterdi, sondai-aq kásiporyndar men áleýmettik nysandardy uiymdastyrýǵa múmkindik beredi, sonymen qatar mamandar men jumysshylar úshin qolaily jaǵdai jasaidy.
Ákim aýyz sýmen qamtamasyz etý máselesine erekshe nazar aýdardy. Sý alý torabyn qarap shyqqan soń, óńir basshysy úzdiksiz sýmen jabdyqtaýdyń mańyzdylyǵyn atap ótti. «Jambyl Sý» ShJQ MKK direktory Almas Kemelbekov júieni jańǵyrtý jumystarynyń barysy týraly baiandap, bul protsestiń jergilikti bilik tarapynan turaqty baqylaýda ekenin jetkizdi.
Sondai-aq jol infraqurylymyn jańǵyrtý máselesi talqylandy. Oblys ákimi sý qubyrlary jelilerin keshendi jańartý jumystaryn júrgizip, jol sapasyn jaqsartýdy tapsyrdy. Bul aýyl turǵyndarynyń ómir súrý deńgeiin kóterýge yqpal etedi.
Sapar aiasynda óńir basshysy «Abylhaiyr» JShS balyq óńdeý zaýytyna bardy. Kásiporyn direktory Rýslan Mýrzalievtiń aitýynsha, zaýyt jylyna birneshe tonna balyq óńdep, kókserke file óndirý qýattylyǵy 770 tonnany quraidy.
«Aýyl sharýashylyǵyn damytý – bizdiń basty mindetterimizdiń biri. Mundai kásiporyndar jańa jumys oryndaryn ashyp, ekonomikalyq ósimge yqpal etedi», – dep atap ótti Marat Sultanǵaziev.
Sonymen qatar, óńir basshysy aýyldyq ambýlatoriia qurylysynyń barysymen tanysty. Oblystyq qurylys basqarmasynyń basshysy Muǵamedǵarip Qurmanǵaliev jobanyń qazirgi jaǵdaiy týraly baiandady.
Burynǵy balabaqsha ǵimaratyn qaita paidalaný máselesi de kóterildi. Jambyl aýdanynyń ákimi Nurlan Ertas jergilikti bilik bul nysandy tiimdi qoldanýdyń ártúrli nusqalaryn qarastyryp jatqanyn aitty.
Oblys ákiminiń orynbasary Áset Masabaevqa aýyldaǵy ǵimarattardyń jaǵdaiyna keshendi tekserý júrgizip, qajetti jóndeý jumystaryn uiymdastyrý tapsyryldy.
Ýlken aýylynda 1200 páter bar, onyń 600-ine turǵyndar qonystanǵan, al 500 páterge qaita qonystandyrý josparlanýda. Sapar qorytyndysy boiynsha óńir basshysy bul máseleni jan-jaqty qarastyrýdy tapsyrdy.
Týrizmdi damytýǵa da erekshe kóńil bólindi. Atap aitqanda, jaǵalaý aýmaqtaryn abattandyrý josparlanyp otyr. Bul óńirdiń týristik áleýetin arttyryp, qosymsha investorlardy tartýǵa múmkindik beredi.
Jergilikti turǵyndarmen kezdesýde jylý, sý jáne elektrmen qamtamasyz etý, sondai-aq abattandyrý máseleleri talqylandy.
«Biz halyqtyń usynystaryn eskerip, aýyldy damytýǵa baǵyttalǵan jobalardy júzege asyrý úshin bar kúshimizdi salamyz. Sapaly infraqurylym men áleýmettik nysandar – turǵyndardyń ál-aýqatyn arttyrýdyń negizgi faktorlary», – dep atap ótti oblys ákimi.
Jumys saparynyń qorytyndysy boiynsha Marat Sultanǵaziev jergilikti bilikke Ýlken aýylyn damytý boiynsha jumysty kúsheitýdi tapsyrdy jáne kóterilgen barlyq máselelerdiń óziniń jeke baqylaýynda bolatynyn jetkizdi.
