الماتى وبلىسىنىڭ اكىمى مارات سۇلتانعازييەۆ جامبىل اۋدانىنىڭ ۋلكەن اۋىلىنا جۇمىس ساپارىمەن باردى. ساپار بارىسىندا ءوڭىر باسشىسى نەگىزگى الەۋمەتتىك جانە ينفراقۇرىلىمدىق نىسانداردى ارالاپ، جەرگىلىكتى تۇرعىندارمەن كەزدەسىپ، اەس جوباسىن جۇزەگە اسىرۋعا بايلانىستى اۋىلدى دامىتۋ مۇمكىندىكتەرىن تالقىلادى،- دەپ حابارلايدى Dalanews.kz
ساپاردىڭ ماڭىزدى بولىگى – قازاقستانداعى العاشقى اتوم ەلەكتر ستانسياسىن سالۋ جوسپارلانعان اۋماقپەن تانىسۋ بولدى. جامبىل اۋدانىنىڭ اكىمى نۇرلان ەرتاستىڭ سۇيەمەلدەۋىمەن ءوڭىر باسشىسى جەر تەلىمىنىڭ سيپاتتامالارىن زەرتتەپ، ستراتەگيالىق جوبانى ىسكە اسىرۋ پەرسپەكتيۆالارىن تالقىلادى.
اەس قۇرىلىسى مەن ونىڭ ودان ءارى پايدالانىلۋىن قاجەتتى رەسۋرستارمەن جانە قىزمەتتەرمەن قامتاماسىز ەتۋ ءۇشىن وبلىس اكىمى يندۋستريالدى ايماق قۇرۋدى تاپسىردى. بۇل ايماق قوسالقى جانە ىلەسپە بيزنەستەردى، سونداي-اق كاسىپورىندار مەن الەۋمەتتىك نىسانداردى ۇيىمداستىرۋعا مۇمكىندىك بەرەدى، سونىمەن قاتار ماماندار مەن جۇمىسشىلار ءۇشىن قولايلى جاعداي جاسايدى.
اكىم اۋىز سۋمەن قامتاماسىز ەتۋ ماسەلەسىنە ەرەكشە نازار اۋداردى. سۋ الۋ تورابىن قاراپ شىققان سوڭ، ءوڭىر باسشىسى ۇزدىكسىز سۋمەن جابدىقتاۋدىڭ ماڭىزدىلىعىن اتاپ ءوتتى. «جامبىل سۋ» شجق مكك ديرەكتورى الماس كەمەلبەكوۆ جۇيەنى جاڭعىرتۋ جۇمىستارىنىڭ بارىسى تۋرالى بايانداپ، بۇل پروسەستىڭ جەرگىلىكتى بيلىك تاراپىنان تۇراقتى باقىلاۋدا ەكەنىن جەتكىزدى.
سونداي-اق جول ينفراقۇرىلىمىن جاڭعىرتۋ ماسەلەسى تالقىلاندى. وبلىس اكىمى سۋ قۇبىرلارى جەلىلەرىن كەشەندى جاڭارتۋ جۇمىستارىن جۇرگىزىپ، جول ساپاسىن جاقسارتۋدى تاپسىردى. بۇل اۋىل تۇرعىندارىنىڭ ءومىر ءسۇرۋ دەڭگەيىن كوتەرۋگە ىقپال ەتەدى.
ساپار اياسىندا ءوڭىر باسشىسى «ابىلحايىر» ج ش س بالىق وڭدەۋ زاۋىتىنا باردى. كاسىپورىن ديرەكتورى رۋسلان مۋرزالييەۆتىڭ ايتۋىنشا، زاۋىت جىلىنا بىرنەشە توننا بالىق وڭدەپ، كوكسەركە فيلە ءوندىرۋ قۋاتتىلىعى 770 توننانى قۇرايدى.
«اۋىل شارۋاشىلىعىن دامىتۋ – ءبىزدىڭ باستى مىندەتتەرىمىزدىڭ ءبىرى. مۇنداي كاسىپورىندار جاڭا جۇمىس ورىندارىن اشىپ، ەكونوميكالىق وسىمگە ىقپال ەتەدى»، – دەپ اتاپ ءوتتى مارات سۇلتانعازييەۆ.
سونىمەن قاتار، ءوڭىر باسشىسى اۋىلدىق امبۋلاتوريا قۇرىلىسىنىڭ بارىسىمەن تانىستى. وبلىستىق قۇرىلىس باسقارماسىنىڭ باسشىسى مۇعامەدعاريپ قۇرمانعالييەۆ جوبانىڭ قازىرگى جاعدايى تۋرالى باياندادى.
بۇرىنعى بالاباقشا عيماراتىن قايتا پايدالانۋ ماسەلەسى دە كوتەرىلدى. جامبىل اۋدانىنىڭ اكىمى نۇرلان ەرتاس جەرگىلىكتى بيلىك بۇل نىساندى ءتيىمدى قولدانۋدىڭ ءارتۇرلى نۇسقالارىن قاراستىرىپ جاتقانىن ايتتى.
وبلىس اكىمىنىڭ ورىنباسارى اسەت ماسابايەۆقا اۋىلداعى عيماراتتاردىڭ جاعدايىنا كەشەندى تەكسەرۋ جۇرگىزىپ، قاجەتتى جوندەۋ جۇمىستارىن ۇيىمداستىرۋ تاپسىرىلدى.
ۋلكەن اۋىلىندا 1200 پاتەر بار، ونىڭ 600-ىنە تۇرعىندار قونىستانعان، ال 500 پاتەرگە قايتا قونىستاندىرۋ جوسپارلانۋدا. ساپار قورىتىندىسى بويىنشا ءوڭىر باسشىسى بۇل ماسەلەنى جان-جاقتى قاراستىرۋدى تاپسىردى.
ءتۋريزمدى دامىتۋعا دا ەرەكشە كوڭىل ءبولىندى. اتاپ ايتقاندا، جاعالاۋ اۋماقتارىن اباتتاندىرۋ جوسپارلانىپ وتىر. بۇل ءوڭىردىڭ تۋريستىك الەۋەتىن ارتتىرىپ، قوسىمشا ينۆەستورلاردى تارتۋعا مۇمكىندىك بەرەدى.
جەرگىلىكتى تۇرعىندارمەن كەزدەسۋدە جىلۋ، سۋ جانە ەلەكترمەن قامتاماسىز ەتۋ، سونداي-اق اباتتاندىرۋ ماسەلەلەرى تالقىلاندى.
«ءبىز حالىقتىڭ ۇسىنىستارىن ەسكەرىپ، اۋىلدى دامىتۋعا باعىتتالعان جوبالاردى جۇزەگە اسىرۋ ءۇشىن بار كۇشىمىزدى سالامىز. ساپالى ينفراقۇرىلىم مەن الەۋمەتتىك نىساندار – تۇرعىنداردىڭ ءال-اۋقاتىن ارتتىرۋدىڭ نەگىزگى فاكتورلارى»، – دەپ اتاپ ءوتتى وبلىس اكىمى.
جۇمىس ساپارىنىڭ قورىتىندىسى بويىنشا مارات سۇلتانعازييەۆ جەرگىلىكتى بيلىككە ۋلكەن اۋىلىن دامىتۋ بويىنشا جۇمىستى كۇشەيتۋدى تاپسىردى جانە كوتەرىلگەن بارلىق ماسەلەلەردىڭ ءوزىنىڭ جەكە باقىلاۋىندا بولاتىنىن جەتكىزدى.
