Almaty oblysynda qyzmettik kólikpen jol apatyna túsken Talǵar aýdany Panfilov aýyldyq okrýginiń ákimi áli jumysqa shyqpaǵan. Ákimdik ókilderiniń málimetinshe, sheneýnik em qabyldaýdy jalǵastyryp jatyr, dep habarlaidy Dalanews.kz Tengrinews.kz-ke silteme jasap.
Jol apaty 13 qyrkúiekte Almaty oblysyndaǵy Qarasaz – Saryjaz tasjolynda bolǵan. Politsiia deregine sáikes, Bestune T55 avtokóliginiń júrgizýshisi rólge ie bola almai, saldarynan kólik aýdarylyp ketken.
Apat saldarynan jolaýshylardyń biri oqiǵa ornynda kóz jumyp, ákim men taǵy bir adam jaraqat alyp, aýrýhanaǵa jetkizilgen.
Keiin Talǵar aýdanynyń ákimdigi jol apatyna túsken kólikte Dýlat Dáýletaliev bolǵanyn rastady. Qaiǵyly jaǵdai boiynsha sotqa deiingi tergeý júrgizilip jatyr.
Sheneýnik aýrýhanadan shyǵarylǵanymen, qyzmettik mindetterine áli kirispegen.
«Dýlat Dáýletaliev statsionardan shyǵaryldy, qazir emin ambýlatorlyq túrde jalǵastyryp jatyr. Búgingi tańda ol aýyldyq okrýg ákimi retindegi mindetterine kirisken joq. Qazirgi ýaqytta eńbekke jaramsyzdyq paraǵynda bolǵandyqtan, oǵan qatysty qyzmettik tekserý júrgizý múmkin emes», – delingen jaýapta.
Áleýmettik jelilerde jol apaty qyzmettik kóliktiń qatysýymen bolǵany týraly aqparat taraǵan. Jergilikti ákimdik ókilderi apat bolǵan kúni kólik maqsatsyz paidalanylǵanyn moiyndady.
Eske salaiyq, bul oqiǵa týraly alǵash bolyp Dalanews.kz redaktsiiasy habarlaǵan bolatyn.
Buǵan deiin bizdiń redaktsiiamyzǵa Narynqol tasjolynda jol apaty bolǵany týraly aqparat tústi. Ondaǵy aqparat boiynsha, kólikte Panfilov aýyldyq okrýginiń ákimi Dýlat Dáýletáliev otyrǵan.
"Kóliktegi adamdar ań aýlaýǵa shyqqan. Bireýi qaitys bolǵan, úsheýi aýrýhanada", - delingen Dalanews redaktsiiasyna túsken aqparatta.
Dalanews.kz tilshileri Dýlat Dáýletáliev Almaty oblystyq klinikalyq aýrýhanasyna aýystyrylǵanyn anyqtady. Jaǵdaiy dinamikada jaqsarǵan. Barlyq meditsinalyq kómek kórsetilgen.
