الماتى وبلىسىندا قىزمەتتىك كولىكپەن جول اپاتىنا تۇسكەن تالعار اۋدانى پانفيلوۆ اۋىلدىق وكرۋگىنىڭ اكىمى ءالى جۇمىسقا شىقپاعان. اكىمدىك وكىلدەرىنىڭ مالىمەتىنشە، شەنەۋنىك ەم قابىلداۋدى جالعاستىرىپ جاتىر، دەپ حابارلايدى Dalanews.kz Tengrinews.kz-كە سىلتەمە جاساپ.
جول اپاتى 13 قىركۇيەكتە الماتى وبلىسىنداعى قاراساز – سارىجاز تاسجولىندا بولعان. پوليسيا دەرەگىنە سايكەس، Bestune T55 اۆتوكولىگىنىڭ جۇرگىزۋشىسى رولگە يە بولا الماي، سالدارىنان كولىك اۋدارىلىپ كەتكەن.
اپات سالدارىنان جولاۋشىلاردىڭ ءبىرى وقيعا ورنىندا كوز جۇمىپ، اكىم مەن تاعى ءبىر ادام جاراقات الىپ، اۋرۋحاناعا جەتكىزىلگەن.
كەيىن تالعار اۋدانىنىڭ اكىمدىگى جول اپاتىنا تۇسكەن كولىكتە دۋلات داۋلەتالييەۆ بولعانىن راستادى. قايعىلى جاعداي بويىنشا سوتقا دەيىنگى تەرگەۋ جۇرگىزىلىپ جاتىر.
شەنەۋنىك اۋرۋحانادان شىعارىلعانىمەن، قىزمەتتىك مىندەتتەرىنە ءالى كىرىسپەگەن.
«دۋلات داۋلەتالييەۆ ستاسيوناردان شىعارىلدى، ءقازىر ەمىن امبۋلاتورلىق تۇردە جالعاستىرىپ جاتىر. بۇگىنگى تاڭدا ول اۋىلدىق وكرۋگ اكىمى رەتىندەگى مىندەتتەرىنە كىرىسكەن جوق. قازىرگى ۋاقىتتا ەڭبەككە جارامسىزدىق پاراعىندا بولعاندىقتان، وعان قاتىستى قىزمەتتىك تەكسەرۋ جۇرگىزۋ مۇمكىن ەمەس»، – دەلىنگەن جاۋاپتا.
الەۋمەتتىك جەلىلەردە جول اپاتى قىزمەتتىك كولىكتىڭ قاتىسۋىمەن بولعانى تۋرالى اقپارات تاراعان. جەرگىلىكتى اكىمدىك وكىلدەرى اپات بولعان كۇنى كولىك ماقساتسىز پايدالانىلعانىن مويىندادى.
ەسكە سالايىق، بۇل وقيعا تۋرالى العاش بولىپ Dalanews.kz رەداكسياسى حابارلاعان بولاتىن.
بۇعان دەيىن ءبىزدىڭ رەداكسيامىزعا نارىنقول تاسجولىندا جول اپاتى بولعانى تۋرالى اقپارات ءتۇستى. ونداعى اقپارات بويىنشا، كولىكتە پانفيلوۆ اۋىلدىق وكرۋگىنىڭ اكىمى دۋلات داۋلەتالييەۆ وتىرعان.
"كولىكتەگى ادامدار اڭ اۋلاۋعا شىققان. بىرەۋى قايتىس بولعان، ۇشەۋى اۋرۋحانادا"، - دەلىنگەن Dalanews رەداكسياسىنا تۇسكەن اقپاراتتا.
Dalanews.kz تىلشىلەرى دۋلات داۋلەتالييەۆ الماتى وبلىستىق كلينيكالىق اۋرۋحاناسىنا اۋىستىرىلعانىن انىقتادى. جاعدايى ديناميكادا جاقسارعان. بارلىق مەديسينالىق كومەك كورسەتىلگەن.
