Almaty oblysynda memlekettik tildi qashyqtan úirenýge múmkindik beretin "TilOquBot" atty innovatsiialyq Telegram-bot iske qosyldy, dep habarlaidy Dalanews.kz
Jańa tsifrlyq qural Prezidenttiń tsifrlandyrý jónindegi tapsyrmasy aiasynda ázirlenip, búginde óńir turǵyndary arasynda keńinen qoldanylýda. Almaty oblysy Tilderdi damytý basqarmasynyń málimetinshe, chat-bot quramynda qazaq tilin meńgerýdiń tórt deńgeiin qamtityn 100 saǵattyq oqý baǵdarlamasy men is júrgizý kýrstary bar. Qazirgi ýaqytta júiege 3 146 adam tirkelgen, olardyń 58 paiyzy oblystyń shalǵai aýdandarynda turady.
– Basty maqsatymyz – qazaq tilin úirenýdi ár azamatqa, onyń turǵylyqty jerine qaramastan, qoljetimdi etý. "TilOquBot" óziniń tiimdiligin dáleldedi: endi eń shalǵai aýyl turǵyndarynyń ózi yńǵaily formatta bilim ala alady. Bul tsifrlyq transformatsiia jaǵdaiynda erekshe mańyzdy, – dedi Tilderdi damytý basqarmasynyń basshysy Daniiar Ahmetov.
Onyń aitýynsha, chat-bot memlekettik til saiasatyn júzege asyrý jolyndaǵy keshendi jumystyń bir bóligine ainaldy. Tsifrlyq jobalarmen qatar, oblysta tilder festivaline daiyndyq bastalǵan.
Atalǵan shara aiasynda túrli baiqaýlar, úzdik oqytýshylar men belsendilerdi marapattaý, sondai-aq memlekettik tildi nasihattaýǵa baǵyttalǵan kreativti jobalardy qoldaý josparlanyp otyr.
– Biz árbir azamattyń qazaq tilin damytý isine úles qosyp jatqanyn sezinýine jaǵdai jasaýǵa tyrysamyz. Búginde til – tek dástúr men mádeniettiń kórinisi ǵana emes, sonymen qatar tehnologiia, jańa formattar men jastardyń álemi. "TilOquBot" – osy zaman talabyna sai keletin, qundylyqtar men tildi ushtastyratyn tamasha mysal, – dep túiindedi Ahmetov.
Basqarma ókilderiniń habarlaýynsha, qyrkúiek aiynda Uiǵyr aýdanynda til festivaliniń qorytyndy sharasy ótedi. Alty nominatsiia boiynsha jeńimpazdar anyqtalyp, olarǵa 300 myńnan 1,5 million teńgege deiingi aqshalai syilyqtar tabystalmaq.
