Almaty oblysy, Uiǵyr aýdanynda alǵash ret plastik jáshik óndiretin óndiristik tseh iske qosyldy. Kásiporyn qaita óńdelgen shikizattan sapaly ónim jasap, jylyna 600 myń dana jáshik shyǵarýǵa qaýqarly. Jobany júzege asyrýǵa 50 million teńge investitsiia salynyp, 10 jańa jumys orny ashyldy, - dep habarlaidy Dalanews.kz
Zamanaýi tehnologiialarmen jabdyqtalǵan óndiris orny ónimniń beriktigi men ekologiialyq tazalyǵyn qamtamasyz etedi. Munda jáshikter halyqaralyq standarttarǵa sai quiylyp, barlyq tasymaldaý jáne saqtaý talaptary qatań saqtalady. Qazirgi óndiristik qýaty aýdannyń jáshikke degen qajettiliginiń 50 paiyzyn ótei alady.
Kásiporyn aldaǵy ýaqytta óndiris kólemin eki esege arttyrýdy josparlap otyr. Jańa qurylǵylar ornatylyp, jyldyq ónim kólemin 1,2 million danaǵa deiin ulǵaitý kózdelýde. Bul joba aimaqtyń ónerkásiptik áleýetin arttyryp qana qoimai, jergilikti turǵyndardy jumyspen qamtýǵa jáne plastik qaldyqtaryn tiimdi paidalanýǵa múmkindik bermek.
Uiǵyr aýdanynyń ákimi Bota Eleýsizova jańa óndiristiń ashylýy óńir ekonomikasyn damytýǵa zor úles qosatynyn atap ótti.
“Bul kásiporyn aýdanymyz úshin mańyzdy bastama. Birinshiden, jańa jumys oryndary ashylyp, jergilikti turǵyndar turaqty jumyspen qamtyldy. Ekinshiden, óńirimizdegi ónerkásip salasy damyp, plastik qaldyqtaryn qaita óńdeý arqyly ekologiiaǵa da oń áser etemiz. Bolashaqta osyndai óndiristerdiń sany arta beredi dep senemiz”, – dedi aýdan ákimi.
Jańa óndiris ornynyń iske qosylýy Uiǵyr aýdanynyń ónerkásiptik áleýetin arttyryp, jas kásipkerlerge úlgi bolmaq.
