Almaty oblysy Qylmystyq-atqarý júiesi departamenti №14 mekeme bastyǵynyń orynbasary ustaldy, dep habarlaidy Dalanews.kz.
Atalǵan derek boiynsha óńirlik prokýratýranyń baspasóz qyzmeti resmi túsinikteme berdi.
"2024 jylǵy 13 qarashada Almaty oblysy prokýratýrasynyń sotqa deiingi tergep - tekserý basqarmasy Almaty oblysy boiynsha QAJD №14 mekemesi bastyǵynyń orynbasaryn birneshe ret para aldy degen kúdikpen ustady", - delingen prokýratýra habarlamasynda.
Qazir qylmystyq is sheńberinde bolǵan oqiǵanyń barlyq mán-jailaryn anyqtaýǵa baǵyttalǵan qajetti tergeý áreketteri júrgizilýde.
"Qazaqstan Respýblikasy qylmystyq is júrgizý kodeksiniń 201-babynyń talaptaryna sáikes ózge de aqparat jariia etilmeidi", - dep habarlady prokýratýra.
Aita keteiik, kúni keshe Qaraǵandy oblysynda áskeri bólim divizionynyń komandiri esirtkiniń iri partiiasymen ustalǵany belgili bolǵan edi.
Orda.kz málimetinshe, № 29108 áskeri bólim divizionynyń komandirin ustaý týraly aqparat buryn jelide paida bolǵan.
Ustaý faktisin Qaraǵandy oblysynyń Politsiia departamenti rastaǵan. Vedomstvonyń málimetinshe, patrýldik politseiler 10 qarashada Balqash-Saryshaǵan jolynda jol erejesin buzǵany úshin "Geely Coolray" avtokóligin toqtatqan.
31 jastaǵy júrgizýshi kólikti memlekettik nómirsiz júrgizgen.
Tekserý kezinde jalpy salmaǵy shamamen 12 keli bolatyn 18 aq untaq paketi tabyldy. Tyiym salynǵan zattyń bolýyn rastaityn jedel-tergeý toby shaqyryldy.
"Esirtkini tabý faktisi boiynsha qylmystyq is qozǵaldy, kúdikti ustaldy jáne ýaqytsha ustaý izoliatoryna ornalastyryldy", - deidi Politsiia departamentiniń ókilderi.
