Almaty oblysynda jer komissiialary músheleri iriktelinip, tazartylady
Bul baǵyttaǵy jumystar birinshiden, turǵyndardyń memlekettik qyzmet alýdaǵy ýaqytyn únemdeýge áser etse, ekinshiden qyzmet kórsetýdiń ashyqtyǵyna, qoljetimdiligine jáne jemqorlyq faktileriniń aldyn alýǵa yqpal etetin faktor. Bul týraly búgin Almaty oblystyq sybailas jemqorlyqtyń aldyn alý máseleleri jónindegi vedomstvoaralyq komissiianyń otyrysynda aityldy.
Búginde Almaty oblysynyń ákimdigi tarapynan 170 memlekettik qyzmet kórsetilse, sonyń 141-i, iaǵni 82,9%-y avtomattandyrylǵan. Óńirlik geoaqparattyq júie aiasynda Almaty oblysynda jer qatynastary men sáýlet salalaryndaǵy 21 memlekettik qyzmetti avtomattandyrý jumystary aiaqtalýǵa jaqyn.
Sol siiaqty bilim men sport salalaryndaǵy taǵy 12 qyzmet túri de avtomattandyrylýda. Turǵyn úi-kommýnaldyq salaǵa, qoǵamdyq kólik qatynasyna tsifrlyq jańalyqtar engizý maqsatynda birqatar jobalar qolǵa alynýda.
Almaty oblystyq tsifrlandyrý basqarmasynyń basshysy Talǵat Omarov Almaty oblysynyń ákimi Amandyq Batalovtyń tóraǵalyǵymen ótken komissiia otyrysynda osyndai málimetter keltirdi. Jiyn barysynda Sybailas jemqorlyqqa qarsy is-qimyl agenttiginiń Almaty oblysy boiynsha departament basshysy E.Maqajanov departament tarapynan jasalǵan taldaý jumystarynyń qorytyndysy boiynsha birqatar máseleler kóterdi.
Máselen, jyl basynan beri Almaty oblysy boiynsha Sybailas jemqorlyqqa qarsy qyzmet 137 quqyq buzýshylyqty anyqtaǵan, sonyń 75,2%-y nemese 103 zańbuzýshylyq – sybailas jemqorlyq sipatyndaǵy qylmystar. Osy merzim ishinde sybailas jemqorlyq áreketterine barǵany úshin 87 adam qylmystyq jaýapqa tartylǵan.
Olardyń qatarynda jergilikti atqarýshy organ qyzmetkerleriniń úlesi birshama. Ásirese, jer qatynastary salasynda jer komissiiasy jumystaryna erekshe qyraǵylyqpen qarap, qajet bolsa komissiia quramyn túbegeili jańadan qalyptastyrý qajettigi de usynyldy. Bul oraida E. Maqajanov jemqorlyq qylmystyń aldyn alý sharalaryna kóbirek kóńil bólip, ár mekeme óziniń ishki baqylaýyn kúsheitýi tiis ekenin atap kórsetti.
Jiyn barysynda oblystyq jer qatynastary basqarmasynyń basshysy Sábit Sádýaqasov ta óz tarapynan jemqorlyqqa qarsy is-qimyl sharalary týraly tolyqtyryp ótti. Onyń aitýynsha, 2015 jyly jerdiń 7 sanaty engizilgen jáne jer ýchaskeleriniń pasporttaryn qaraý múmkindigi bar elektrondyq karta jasaldy. Qazirgi ýaqytta jer kartasynyń qabattary men obektileriniń quramy keńeitildi. 2017 jyly elektrondyq kartany memlekettik tizilimmen jáne oblys basqarmalarynyń derekter bazasymen integratsiialaý júrgizildi.
Sol siiaqty 2019 jyly kórsetiletin memqyzmetterdi tsifrlandyrýǵa oblystyq biýdjetten 508,0 mln. teńge bólinip, igerilgen. Almaty aglomeratsiiasyn qamti otyryp, aqparattyq qaýipsizdikti qamtamasyz etý, memlekettik jer kadastrynyń avtomattandyrylǵan aqparattyq júiesiniń geoportalyn, «Jyljymaityn múlik tirkelimi» memlekettik derekter qorynyń aqparattyq júiesin, halyqqa qyzmet kórsetý ortalyqtarynyń aqparattyq júiesin integratsiialaý jumystary júrgizilýde. Bul maqsatqa 272,6 mln. teńge somasyna biýdjettik ótinim berilip, jumystar Almaty qalasyna jaqyn ornalasqan 5 aýdan ortalyǵynda júrgiziledi dep josparlanǵan.
Jiyn sońynda oblys ákimi Amandyq Batalov oqylǵan baiandamalar men aitylǵan usynystardy qoryta kele:
– Búgingi kóterilip otyrǵan máselelerdiń bári de ózekti. Biz Sybailas jemqorlyqqa qarsy qyzmet departamentimen birlesip, jemqorlyq áreketterdiń aldyn alý, túsindirý jumystaryn úzdiksiz, qajet bolsa departamentten jan-jaqty ádistemelik kómek ala otyryp atqarýymyz kerek. Ár mekeme-uiym óziniń ishki baqylaýyn kúsheitýi kerek. Aýdan, qala ákimderine jer máselesinde zańsyzdyqtarǵa jol bermeý týraly qatań eskertemin. Orynbasarym Serik Turdalievke aýdan, qalalardaǵy jer komissiialary jumysyn egjei-tegjeili zerdeleýdi tapsyramyn. Kemshilikterge, zań buzýshylyqqa jol bergenderdiń komissiia quramynda qalýyna jol berilmeidi. Túgeldei qaita jasaqtap, jańartý kerek. Rasynda, koronavirýsqa bailanysty shekteý kezeńi bizge tsifrlandyrý isimen túbegeili ainalysý qajettigin aiqyn kórsetti. Qyzmet túrlerin avtomattandyrýdy odan ári údetýimiz kerek, – dedi A. Batalov.
Almaty oblysy ákiminiń baspasóz qyzmeti
