بۇل باعىتتاعى جۇمىستار بىرىنشىدەن، تۇرعىنداردىڭ مەملەكەتتىك قىزمەت الۋداعى ۋاقىتىن ۇنەمدەۋگە اسەر ەتسە، ەكىنشىدەن قىزمەت كورسەتۋدىڭ اشىقتىعىنا، قولجەتىمدىلىگىنە جانە جەمقورلىق فاكتىلەرىنىڭ الدىن الۋعا ىقپال ەتەتىن فاكتور. بۇل تۋرالى بۇگىن الماتى وبلىستىق سىبايلاس جەمقورلىقتىڭ الدىن الۋ ماسەلەلەرى جونىندەگى ۆەدومستۆوارالىق كوميسسيانىڭ وتىرىسىندا ايتىلدى.
بۇگىندە الماتى وبلىسىنىڭ اكىمدىگى تاراپىنان 170 مەملەكەتتىك قىزمەت كورسەتىلسە، سونىڭ 141ء-ى، ياعني 82،9%-ى اۆتوماتتاندىرىلعان. وڭىرلىك گەواقپاراتتىق جۇيە اياسىندا الماتى وبلىسىندا جەر قاتىناستارى مەن ساۋلەت سالالارىنداعى 21 مەملەكەتتىك قىزمەتتى اۆتوماتتاندىرۋ جۇمىستارى اياقتالۋعا جاقىن.
سول سياقتى ءبىلىم مەن سپورت سالالارىنداعى تاعى 12 قىزمەت ءتۇرى دە اۆتوماتتاندىرىلۋدا. تۇرعىن ۇي-كوممۋنالدىق سالاعا، قوعامدىق كولىك قاتىناسىنا سيفرلىق جاڭالىقتار ەنگىزۋ ماقساتىندا ءبىرقاتار جوبالار قولعا الىنۋدا.
الماتى وبلىستىق سيفرلاندىرۋ باسقارماسىنىڭ باسشىسى تالعات وماروۆ الماتى وبلىسىنىڭ اكىمى اماندىق باتالوۆتىڭ توراعالىعىمەن وتكەن كوميسسيا وتىرىسىندا وسىنداي مالىمەتتەر كەلتىردى. جيىن بارىسىندا سىبايلاس جەمقورلىققا قارسى ءىس-قيمىل اگەنتتىگىنىڭ الماتى وبلىسى بويىنشا دەپارتامەنت باسشىسى ە.ماقاجانوۆ دەپارتامەنت تاراپىنان جاسالعان تالداۋ جۇمىستارىنىڭ قورىتىندىسى بويىنشا ءبىرقاتار ماسەلەلەر كوتەردى.
ماسەلەن، جىل باسىنان بەرى الماتى وبلىسى بويىنشا سىبايلاس جەمقورلىققا قارسى قىزمەت 137 قۇقىق بۇزۋشىلىقتى انىقتاعان، سونىڭ 75،2%-ى نەمەسە 103 زاڭبۇزۋشىلىق – سىبايلاس جەمقورلىق سيپاتىنداعى قىلمىستار. وسى مەرزىم ىشىندە سىبايلاس جەمقورلىق ارەكەتتەرىنە بارعانى ءۇشىن 87 ادام قىلمىستىق جاۋاپقا تارتىلعان.
ولاردىڭ قاتارىندا جەرگىلىكتى اتقارۋشى ورگان قىزمەتكەرلەرىنىڭ ۇلەسى ءبىرشاما. اسىرەسە، جەر قاتىناستارى سالاسىندا جەر كوميسسياسى جۇمىستارىنا ەرەكشە قىراعىلىقپەن قاراپ، قاجەت بولسا كوميسسيا قۇرامىن تۇبەگەيلى جاڭادان قالىپتاستىرۋ قاجەتتىگى دە ۇسىنىلدى. بۇل ورايدا ە. ماقاجانوۆ جەمقورلىق قىلمىستىڭ الدىن الۋ شارالارىنا كوبىرەك كوڭىل ءبولىپ، ءار مەكەمە ءوزىنىڭ ىشكى باقىلاۋىن كۇشەيتۋى ءتيىس ەكەنىن اتاپ كورسەتتى.
جيىن بارىسىندا وبلىستىق جەر قاتىناستارى باسقارماسىنىڭ باسشىسى ءسابيت ءسادۋاقاسوۆ تا ءوز تاراپىنان جەمقورلىققا قارسى ءىس-قيمىل شارالارى تۋرالى تولىقتىرىپ ءوتتى. ونىڭ ايتۋىنشا، 2015 جىلى جەردىڭ 7 ساناتى ەنگىزىلگەن جانە جەر ۋچاسكەلەرىنىڭ پاسپورتتارىن قاراۋ مۇمكىندىگى بار ەلەكتروندىق كارتا جاسالدى. قازىرگى ۋاقىتتا جەر كارتاسىنىڭ قاباتتارى مەن وبەكتىلەرىنىڭ قۇرامى كەڭەيتىلدى. 2017 جىلى ەلەكتروندىق كارتانى مەملەكەتتىك تىزىلىممەن جانە وبلىس باسقارمالارىنىڭ دەرەكتەر بازاسىمەن ينتەگراسيالاۋ جۇرگىزىلدى.
سول سياقتى 2019 جىلى كورسەتىلەتىن مەمقىزمەتتەردى سيفرلاندىرۋعا وبلىستىق بيۋدجەتتەن 508،0 ملن. تەڭگە ءبولىنىپ، يگەرىلگەن. الماتى اگلومەراسياسىن قامتي وتىرىپ، اقپاراتتىق قاۋىپسىزدىكتى قامتاماسىز ەتۋ، مەملەكەتتىك جەر كاداسترىنىڭ اۆتوماتتاندىرىلعان اقپاراتتىق جۇيەسىنىڭ گەوپورتالىن، «جىلجىمايتىن مۇلىك تىركەلىمى» مەملەكەتتىك دەرەكتەر قورىنىڭ اقپاراتتىق جۇيەسىن، حالىققا قىزمەت كورسەتۋ ورتالىقتارىنىڭ اقپاراتتىق جۇيەسىن ينتەگراسيالاۋ جۇمىستارى جۇرگىزىلۋدە. بۇل ماقساتقا 272،6 ملن. تەڭگە سوماسىنا بيۋدجەتتىك ءوتىنىم بەرىلىپ، جۇمىستار الماتى قالاسىنا جاقىن ورنالاسقان 5 اۋدان ورتالىعىندا جۇرگىزىلەدى دەپ جوسپارلانعان.
جيىن سوڭىندا وبلىس اكىمى اماندىق باتالوۆ وقىلعان باياندامالار مەن ايتىلعان ۇسىنىستاردى قورىتا كەلە:
– بۇگىنگى كوتەرىلىپ وتىرعان ماسەلەلەردىڭ ءبارى دە وزەكتى. ءبىز سىبايلاس جەمقورلىققا قارسى قىزمەت دەپارتامەنتىمەن بىرلەسىپ، جەمقورلىق ارەكەتتەردىڭ الدىن الۋ، ءتۇسىندىرۋ جۇمىستارىن ۇزدىكسىز، قاجەت بولسا دەپارتامەنتتەن جان-جاقتى ادىستەمەلىك كومەك الا وتىرىپ اتقارۋىمىز كەرەك. ءار مەكەمە-ۇيىم ءوزىنىڭ ىشكى باقىلاۋىن كۇشەيتۋى كەرەك. اۋدان، قالا اكىمدەرىنە جەر ماسەلەسىندە زاڭسىزدىقتارعا جول بەرمەۋ تۋرالى قاتاڭ ەسكەرتەمىن. ورىنباسارىم سەرىك تۇردالييەۆكە اۋدان، قالالارداعى جەر كوميسسيالارى جۇمىسىن ەگجەي-تەگجەيلى زەردەلەۋدى تاپسىرامىن. كەمشىلىكتەرگە، زاڭ بۇزۋشىلىققا جول بەرگەندەردىڭ كوميسسيا قۇرامىندا قالۋىنا جول بەرىلمەيدى. تۇگەلدەي قايتا جاساقتاپ، جاڭارتۋ كەرەك. راسىندا، كوروناۆيرۋسقا بايلانىستى شەكتەۋ كەزەڭى بىزگە سيفرلاندىرۋ ىسىمەن تۇبەگەيلى اينالىسۋ قاجەتتىگىن ايقىن كورسەتتى. قىزمەت تۇرلەرىن اۆتوماتتاندىرۋدى ودان ءارى ۇدەتۋىمىز كەرەك، – دەدى ا. باتالوۆ.
الماتى وبلىسى اكىمىنىڭ باسپا ءسوز قىزمەتى
