Almaty oblysynda 50 myń bala mektep tabaldyryǵyn attaidy
Bilim salasynyń ózekti máseleleri men aldaǵy mindetter týraly máseleler talqylanǵan jiynda jasaǵan baiandamasynda oblys basshysy Amandyq Batalov Nur-Sultan qalasynda ótken «Bilim jáne Gylym!» Respýblikalyq tamyz pedagogikalyq keńesinde Memleket basshysy Qasym-Jomart Toqaevtyń bilim salasyn damytýda jańasha talaptar men úderisterge sai bolý mindetterin qoiǵanyn atap ótip, jańa oqý jylyndaǵy iske asyrylýy tiis is-sharalarǵa toqtaldy.
Bul oraida oqý isin qarjylandyrý da jyldan-jylǵa ósip, jańa mektepter qatary tolyǵa túsýde. Máselen, memleket qoldaýynyń arqasynda biylǵy jyly oblysta bilim salasynyń 20 nysany, iaǵni 15 mektep pen 4 kolledj salynýda. Osy maqsatqa 9,9 mlrd teńge bólinse, materialdyq-tehnikalyq bazany nyǵaitýǵa 8,2 mlrd teńge qarastyrylǵan.
– Aldyn ala júrgizilgen esepteýler boiynsha jańa oqý jylynda 50 myńǵa jýyq bala birinshi synypqa barady. Bul rette sońǵy 5 jylda oblys halqynyń sany 300 myńǵa artqanyn aita ketý kerek. Osyǵan bailanysty qosymsha sharalar qabyldaýymyz kerek, – dep atap ótti A.Batalov.
Oblystyq bilim basqarmasy, aýdan, qala ákimderi jergilikti jerlerdegi demografiialyq jáne migratsiialyq kórsetkishterdi baqylap otyrýdy jáne jekemenshik mektepter salýǵa kásipkerlerdi tartýda nátijeli jumys jasaýdy tapsyrdy.
