Óńirdiń ınvestısıalyq potensıaly jáne ony ári qaraı da órkendetý joldary sóz bolatyn sharaǵa qazaqstandyq jáne sheteldik kásipkerler qatysýda.
2014 jyldan beri ishki jáne syrtqy ınvestısıalardy tartý jóninen Almaty oblysy alda keledi. 2014-2016 jyldardyń aralyǵynda oblystaǵy ishki ınvestısıa 27 paıyzǵa ósken (2016 jyly 477 mlrd teńge).
Byltyrǵy jyldyń qorytyndysy boıynsha Almaty oblysy shıkizattyq emes sheteldik ınvestısıalar tartý jaǵynan kósh bastaǵan. Ótken jyly óńirge shamamen 77 mlrd teńge ınvestısıa tartylǵan. Shıkizattyq emes ınvestısıa kólemi oblysta osymen úshinshi jyl qatarynan 20 paıyzǵa ósip otyr.
Forýmnyń aldynda oblys ákimi Amandyq Batalov 3 trln 240 mlrd teńgeni quraıtyn 13 memorandýmǵa qol qoıdy.
Olardyń arasynda İle aýdanynda salynatyn "Qaskeleń Solar Paýer" elektrostansıasy, Sarqand aýdanynda boı kóteretin "VES Abaı" jel elektrostansıasynyń qurylysy bar. Budan bólek Jambyl aýdanynda bir aýysymda 250 adamǵa arnalǵan aýdandyq emhana aldaǵy jyldary paıdalanýǵa beriledi.
Sharanyń shymyldyǵyn túrgen Almaty oblysynyń ákimi Amandyq Batalov óńirge ınvestor tartýdyń tabysty joldaryn aıtyp berdi.
"Investordyń tilin tabý úshin iskerlik formatty ustaný qajet" dedi óńir basshysy.
Ákimniń aıtýynsha sońǵy 5 jylda óńirde ónerkásiptik óndiristiń kólemi 66 paıyzǵa artqan. Elimizdegi jańǵyrtylatyn 74 energıa nysandarynyń 24-i Almaty oblysynda. Ótken aıda ǵana sıngapýrlyq ınvestor Universal Energy kompanıasy qýattylyǵy 100 mVT kún elektrostansıasyn salyp, paıdalanýǵa berdi.
Óńirdegi bıznes ahýaldyń túzelýi óz kezeginde týrızmge de oń yqpal etip otyr. Amandyq Batalovtyń aıtyp ótkenindeı bıyl Alakólge 1,3 mln adam demalýǵa barǵan.
Shara aıasynda óńirde ınvestısıa salǵan ózimizdiń otandyq ınvestorlar, onyń ishinde Zeınolla Kákimjanov, Raıymbek Batalov, Bolat Ábilov sóz alyp, tájirıbelerimen bólisti.
