ءوڭىردىڭ ينۆەستيسيالىق پوتەنسيالى جانە ونى ءارى قاراي دا وركەندەتۋ جولدارى ءسوز بولاتىن شاراعا قازاقستاندىق جانە شەتەلدىك كاسىپكەرلەر قاتىسۋدا.
2014 جىلدان بەرى ىشكى جانە سىرتقى ينۆەستيسيالاردى تارتۋ جونىنەن الماتى وبلىسى الدا كەلەدى. 2014-2016 جىلداردىڭ ارالىعىندا وبلىستاعى ىشكى ينۆەستيسيا 27 پايىزعا وسكەن (2016 جىلى 477 ملرد تەڭگە).
بىلتىرعى جىلدىڭ قورىتىندىسى بويىنشا الماتى وبلىسى شيكىزاتتىق ەمەس شەتەلدىك ينۆەستيسيالار تارتۋ جاعىنان كوش باستاعان. وتكەن جىلى وڭىرگە شامامەن 77 ملرد تەڭگە ينۆەستيسيا تارتىلعان. شيكىزاتتىق ەمەس ينۆەستيسيا كولەمى وبلىستا وسىمەن ءۇشىنشى جىل قاتارىنان 20 پايىزعا ءوسىپ وتىر.
فورۋمنىڭ الدىندا وبلىس اكىمى اماندىق باتالوۆ 3 ترلن 240 ملرد تەڭگەنى قۇرايتىن 13 مەموراندۋمعا قول قويدى.
ولاردىڭ اراسىندا ىلە اۋدانىندا سالىناتىن "قاسكەلەڭ سولار پاۋەر" ەلەكتروستانسياسى، سارقاند اۋدانىندا بوي كوتەرەتىن "ۆەس اباي" جەل ەلەكتروستانسياسىنىڭ قۇرىلىسى بار. بۇدان بولەك جامبىل اۋدانىندا ءبىر اۋىسىمدا 250 ادامعا ارنالعان اۋداندىق ەمحانا الداعى جىلدارى پايدالانۋعا بەرىلەدى.
شارانىڭ شىمىلدىعىن تۇرگەن الماتى وبلىسىنىڭ اكىمى اماندىق باتالوۆ وڭىرگە ينۆەستور تارتۋدىڭ تابىستى جولدارىن ايتىپ بەردى.
"ينۆەستوردىڭ ءتىلىن تابۋ ءۇشىن ىسكەرلىك فورماتتى ۇستانۋ قاجەت" دەدى ءوڭىر باسشىسى.
اكىمنىڭ ايتۋىنشا سوڭعى 5 جىلدا وڭىردە ونەركاسىپتىك ءوندىرىستىڭ كولەمى 66 پايىزعا ارتقان. ەلىمىزدەگى جاڭعىرتىلاتىن 74 ەنەرگيا نىساندارىنىڭ 24ء-ى الماتى وبلىسىندا. وتكەن ايدا عانا سينگاپۋرلىق ينۆەستور Universal Energy كومپانياسى قۋاتتىلىعى 100 مۆت كۇن ەلەكتروستانسياسىن سالىپ، پايدالانۋعا بەردى.
وڭىردەگى بيزنەس احۋالدىڭ تۇزەلۋى ءوز كەزەگىندە تۋريزمگە دە وڭ ىقپال ەتىپ وتىر. اماندىق باتالوۆتىڭ ايتىپ وتكەنىندەي بيىل الاكولگە 1،3 ملن ادام دەمالۋعا بارعان.
شارا اياسىندا وڭىردە ينۆەستيسيا سالعان ءوزىمىزدىڭ وتاندىق ينۆەستورلار، ونىڭ ىشىندە زەينوللا كاكىمجانوۆ، رايىمبەك باتالوۆ، بولات ءابىلوۆ ءسوز الىپ، تاجىريبەلەرىمەن ءبولىستى.
