El basyna kún týǵanda Almaty oblysy da únsiz qalmady. Alǵashqylardyń biri bop, Áýliekól aýdanynyń turǵyndaryna qoldan kelgenshe qoldaý kórsetip jatyr.
Búgin Qostanai oblysyna jalpy salmaǵy 105 tonnadan astam azyq-túlik gýmanitarlyq kómek jiberildi.
Birneshe kún boiy otandastarymyzǵa Almaty oblysynyń ákimdigi, eriktiler, jastar, kásipkerler men janashyr azamattar shette qalmai, azyq-túlikpen qatar qurylys materialdary men jeke kútim quraldary jiberip otyrdy.
Front keńseniń basshysy Erasyl Tolymbekulynyń aitýynsha, Almaty oblysynyń ákimdigi Qostanai oblysynyń mekemesimen bailanysta bop, gýmanitarlyq kómek jinaǵan.
– Osyndai qiyn-qystaý sátterde qazaqstandyqtar aýyzbirshilikterin kórsetip jatyr. El Prezidenti Qasym-Jomart Toqaev zardap shekkenderdiń otbasylarymen jeke kezdesip, árbir otbasy bizdiń Úkimettiń qaraýynsyz qalmaitynyn aitty. Qostanai oblysynda zardap shekkenderge kómek kórsetý jónindegi halyq aktsiiasyn qoldai otyryp, Almaty oblysy da kómekke óz úlesterin qosýda. Iaǵni, balalarǵa arnalǵan jaialyqtar – 9 myń dana, qurylys materialdary – 10 tonna, azyq-túlikten: kúnbaǵys maiy, taýyq eti – 10 tonna, kespe – 3 tonna, piiaz-7 tonna, kúrish pen alma-5 tonnadan jáne taǵy da basqasy bar. Sonymen qatar, birqatar memlekettik qyzmetkerler bir kúndik jalaqylaryn aýdardyi. Qazirgi ýaqytta aimaqtan eki gazel men tórt júk kóligi shyqty. Qostanai oblysyna kómekke 10 erikti ketti, – dedi ol.
