Jambyl aýdanynda polısıa qyzmetkerleri 12 bas jylqyny urlaý týraly rezonanstyq isti ashty, – dep habarlaıdy Dalanews.kz Almaty oblysy ákiminiń baspasóz qyzmetine silteme jasap.

Oqıǵa 8 qarashada Aqdala aýylynda boldy. Sharýa qojalyǵynyń ıesi jalpy quny 10,6 mln teńgeni quraıtyn 12 bas jylqynyń urlanǵany týraly aryzdandy. Polısıa qylmystyq isti tirkep, dereý izdeýge kiristi.

– Jedel-izdestirý is-sharalary barysynda kúdikti ustaldy. Ol buryn sottalǵan jergilikti turǵyn bolyp shyqty. Jaýap alý kezinde ol óziniń kinásin tolyq moıyndady. Er adam ýaqytsha ustaý ızolátoryna qamaldy. Qazirgi ýaqytta onyń basqa da osyndaı qylmystarǵa qatysy bar-joǵy tekserilýde, – dep habarlady polısıada.

Osyǵan uqsas mal urlyq oqıǵalary İle jáne Eńbekshiqazaq aýdandarynda tirkeldi, onda qaskúnemder bir jylqy men iri qara maldy urlap áketken. Krımınaldyq polısıa qyzmetkerleriniń úılesimdi jumysynyń arqasynda kúdiktiler ustaldy. Qylmystyq ister qozǵaldy, tergeý júrgizilýde.

Polısıa mal ıelerine saqtyq sharalaryn ustaný kerektigin eskertedi. Mal urlyǵy jaǵdaılarynyń kópshiligi tiri múlikti qorǵaýǵa nemquraıly qaraýǵa baılanysty. Tártip saqshylary azamattardy qaskúnemderdiń qurbany bolmas úshin maldy tıisti qaraýsyz qaldyrmaýǵa shaqyrady.