Almaty oblysy ákiminiń orynbasary bolyp taǵaiyndalǵan Ǵani Mailybaev buǵan deiin Almaty qalasynyń Mádeniet basqarmasyn basqardy. Onyń jetekshiligi kezeńinde megapolistiń mádeni ómirinde aýqymdy ózgerister júzege asty, dep habarlaidy Dalanews.kz.
Onyń bastamasymen qalalyq kitaphanalardyń 97%-y modernizatsiiadan ótip, 24/7 formatynda jumys istei bastady. Kitaphanalarda avtomattandyrý júiesi engizilip, materialdyq-tehnikalyq baza tolyq jańartyldy.
Mýzei isi de jańa serpin aldy. Mýzei qorlarynyń 90%-y tsifrlandyrylyp, Sábit Muqanov pen Nurǵisa Tilendievtiń memorialdyq mýzeileri jańartyldy. Raiymbek batyrdyń memorialdyq mýzei kesheniniń qurylysy bastaldy. Sonymen qatar, Almaty mýzeileriniń jumysy TÚRKSOI tarapynan «Úzdik» dep tanylyp, sheteldiń jetekshi mýzeilerimen yntymaqtastyq ornady.
Mailybaev basqarǵan kezeńde Almatynyń mádeni ómiri halyqaralyq deńgeige kóterildi. Qalada Jennifer Lopez, 50 Cent, Lara Fabian, Tarkan siiaqty álemdik juldyzdardyń kontsertteri ótti. Tsirk pen Qýyrshaq teatry halyqaralyq festivalderdi qaita jandandyryp, otandyq artister shet elderde júldeli oryndarǵa ie boldy.
Sondai-aq, ol mádeniet salasy qyzmetkerleriniń kásibi biliktiligin arttyrýǵa erekshe nazar aýdardy. Sońǵy jyldary 300-den astam maman sheteldik mádeni ortalyqtarda taǵylymdamadan ótti.
Jalpy, Mailybaevtyń bastamalary Almatyny mádeni týrizmniń ortalyǵyna ainaldyrýǵa aitarlyqtai yqpal etti.
Aita keteiik, Ǵani Aidaruly 1987 jyly dúniege kelgen. 2008 jyly Abai atyndaǵy Qazaq ulttyq pedagogikalyq ýniversitetin «Qarjy» mamandyǵy boiynsha támamdady. 2010 jyly osy oqý ornynda «Quqyq jáne ekonomika negizderi» mamandyǵy boiynsha magistr dárejesin aldy. 2018 jyly Resei Federatsiiasy Prezidenti janyndaǵy Halyq sharýashylyǵy jáne memlekettik qyzmet akademiiasyn «Aimaqtyq jáne mýnitsipaldyq basqarý» mamandyǵy boiynsha támamdady.
Eńbek jolyn 2008 jyly bastaǵan. Ár jyldary Almaty qalasynyń Medeý aýdany ákiminiń orynbasary, Naýryzbai aýdany ákiminiń orynbasary, sondai-aq Jambyl oblysy týrizm basqarmasynyń basshysy qyzmetterin atqardy.
