Halyqaralyq qarttar kúni qarsańynda Almaty oblysynyń ákimi Marat Sultanǵaziev Qonaev qalasynda turatyn 81 jastaǵy Jaqabai Jumaǵululy men 79 jastaǵy jubaiy Aitańsyq Turǵanbaevany shańyraǵyna baryp quttyqtady.
Oblys basshysy bul kúni tek qarttarymyzdyń qadir-qasietin arttyryp qana qoimai, sonymen qatar olardyń ómir joly men sińirgen eńbekterin baǵalaýdyń mańyzdylyǵyn atap ótti.
«Jas urpaqqa qarttarymyzdyń ómiri, olardyń bai tájiribesi, eńbek joly men otbasylyq qundylyqtary úlgi bolýy tiis. Qoǵamymyzda qarttarǵa degen qurmetti arttyrý, olardyń tarihyn baǵalaý jáne urpaqtar arasyndaǵy bailanysty nyǵaitý úlken mańyzǵa ie», - dedi Marat Sultanǵaziev.
Jaqabai Jumaǵululynyń ómir joly temirjol salasymen tyǵyz bailanysty. 1960 jyly qarapaiym jumysshy bolyp eńbek jolyn bastap, joǵary laýazymdarǵa deiin kóterilip, 2006 jyly zeinetke shyqqan. Atqarǵan qyzmeti úshin «Qazaqstan Respýblikasynyń qurmetti temirjolshysy» tósbelgisimen marapattalǵan. Sonymen qatar, traktorshy jáne dánekerleýshi kýrstaryn bitirip, óz bilimin únemi jetildirip otyrǵan.
Al Aitańsyq Turǵanbaeva - ulaǵatty ustaz. Abai atyndaǵy Qazaq pedagogikalyq institýtynyń geografiia fakýltetin syrttai oqyp bitirgen. Qosqudyq beketinde geografiia pániniń muǵalimi, sońǵy 12 jylda mektep direktorynyń orynbasary qyzmetin atqarǵan. 36 jyldyq eńbek jolynda «Halyq aǵartý isiniń ozyq qyzmetkeri» tósbelgisimen marapattalǵan.
Jaqabai ata men Aitańsyq apaidyń otasqandaryna 60 jyl tolyp otyr. Bes bala tárbielep ósirgen, 14 nemere jáne 21 shóberesi bar.
