حالىقارالىق قارتتار كۇنى قارساڭىندا الماتى وبلىسىنىڭ اكىمى مارات سۇلتانعازييەۆ قونايەۆ قالاسىندا تۇراتىن 81 جاستاعى جاقاباي جۇماعۇل ۇلى مەن 79 جاستاعى جۇبايى ايتاڭسىق تۇرعانبايەۆانى شاڭىراعىنا بارىپ قۇتتىقتادى.

وبلىس باسشىسى بۇل كۇنى تەك قارتتارىمىزدىڭ قادىر-قاسيەتىن ارتتىرىپ قانا قويماي، سونىمەن قاتار ولاردىڭ ءومىر جولى مەن سىڭىرگەن ەڭبەكتەرىن باعالاۋدىڭ ماڭىزدىلىعىن اتاپ ءوتتى.

«جاس ۇرپاققا قارتتارىمىزدىڭ ءومىرى، ولاردىڭ باي تاجىريبەسى، ەڭبەك جولى مەن وتباسىلىق قۇندىلىقتارى ۇلگى بولۋى ءتيىس. قوعامىمىزدا قارتتارعا دەگەن قۇرمەتتى ارتتىرۋ، ولاردىڭ تاريحىن باعالاۋ جانە ۇرپاقتار اراسىنداعى بايلانىستى نىعايتۋ ۇلكەن ماڭىزعا يە»، - دەدى مارات سۇلتانعازييەۆ.

جاقاباي جۇماعۇل ۇلىنىڭ ءومىر جولى تەمىرجول سالاسىمەن تىعىز بايلانىستى. 1960 جىلى قاراپايىم جۇمىسشى بولىپ ەڭبەك جولىن باستاپ، جوعارى لاۋازىمدارعا دەيىن كوتەرىلىپ، 2006 جىلى زەينەتكە شىققان. اتقارعان قىزمەتى ءۇشىن «قازاقستان رەسپۋبليكاسىنىڭ قۇرمەتتى تەمىرجولشىسى» توسبەلگىسىمەن ماراپاتتالعان. سونىمەن قاتار، تراكتورشى جانە دانەكەرلەۋشى كۋرستارىن ءبىتىرىپ، ءوز ءبىلىمىن ۇنەمى جەتىلدىرىپ وتىرعان.

ال ايتاڭسىق تۇرعانبايەۆا - ۇلاعاتتى ۇستاز. اباي اتىنداعى قازاق پەداگوگيكالىق ينستيتۋتىنىڭ گەوگرافيا فاكۋلتەتىن سىرتتاي وقىپ بىتىرگەن. قوسقۇدىق بەكەتىندە گەوگرافيا ءپانىنىڭ ءمۇعالىمى، سوڭعى 12 جىلدا مەكتەپ ديرەكتورىنىڭ ورىنباسارى قىزمەتىن اتقارعان. 36 جىلدىق ەڭبەك جولىندا «حالىق اعارتۋ ءىسىنىڭ وزىق قىزمەتكەرى» توسبەلگىسىمەن ماراپاتتالعان.

جاقاباي اتا مەن ايتاڭسىق اپايدىڭ وتاسقاندارىنا 60 جىل تولىپ وتىر. بەس بالا تاربيەلەپ وسىرگەن، 14 نەمەرە جانە 21 شوبەرەسى بار.