Áleýmettik jelide marqum áskeri qyzmetshi Oljas Muhtarulynyń jaqyn dosy oǵan arnap júrek tebirenterlik jazba jariialady, dep habarlaidy dalanews.kz.
Jazba avtory Oljasty minezi berik, qaisar, namysshyl ári eline adal qyzmet etken azamat retinde eske alǵan.
"Temirdei minezdi, aqjarqyn, qaisar, namysshyl dosym, janym baýyrym. Asqaqtaǵan armanyń men maqsattaryń kóp edi. Sýdan qorqatynyńdy bile tura, nege namysqa berilip sekirdiń, dosym? Seniń endi aramyzda joq ekenińe áli de sengim kelmeidi. Nege erte kettiń, baýyrym?", — dep jazdy ol.
Marqumnyń dosynyń aitýynsha, ekeýiniń birge júzege asyrmaq bolǵan josparlary az bolmaǵan. Sondai-aq olardyń arasynda aitylmai qalǵan sózder men aiaqtalmai qalǵan armandar kóp ekenin jetkizdi.
Ol Oljastyń ózi úshin qarapaiym dos qana emes, qiyndyq pen qýanyshty birge bólisken týǵan baýyrdai jaqyn adam bolǵanyn atap ótti.
Jazbada marqumnyń segiz jyl bilim alyp, oqý ornyn qyzyl diplommen aiaqtaǵany jáne aǵa leitenant shenin alǵany da aitylǵan.
Dosynyń sózinshe, Oljas Muhtaruly elge qyzmet etýdi biik mindet sanaǵan jáne óz qyzmetin abyroimen atqarǵan.
"Seniń elge degen janashyrlyǵyń, ultyńdy aryńnan biik qoiatynyń barlyǵyna úlgi edi. Elińe adal qyzmet ettiń, óz mindetińdi abyroimen atqardyń, dosym. Sen meniń máńgi júregimdesiń", — dep jazdy dosy.
Jazba sońynda ol marqumnyń jasaǵan jaqsylyqtary qabyl bolyp, jany jánnattan oryn alýyn tiledi.
