Jetisý jurtshylyǵy «Jastar» saıabaǵynda qydyryp, merekelik sharalardy tamashalady. Oblys ákimi Amandyq Batalov kishkentaı balǵyndardyń tusaýyn kesip, kópshilikti Ulys kúnimen quttyqtady, – dep habarlaıdy Almaty oblysy ákiminiń baspasóz qyzmeti.
Ulystyń uly kúni – Naýryz merekesi Taldyqorǵan qalasynda bulaqtyń kózin ashyp, № 28 İT mekteptiń aldyna aǵash otyrǵyzýdan bastaldy. Bul iske oblys ákimi Amandyq Batalovpen birge aqsaqaldar men zıaly qaýym ókilderi, Assambleıa músheleri, jastar men oqýshylar atsalysty. Qalanyń 8-shaǵyn aýdanyndaǵy 56 páterli turǵyn úı paıdalanýǵa berilip, kiltteri tapsyryldy.
Osy kúni «Jastar» sport saraıynyń aýmaǵynda ornalasqan «Taıqazan alańynda» merekege arnalǵan 1 tonna baýyrsaq pen 5 myń lıtr Naýryz kóje kelgen adamdarǵa tegin taratyldy.
Memlekettik Tý alańynda Jastar aýyly quryldy.
Ata-analardyń suraýymen oblys ákimi Amandyq Batalov «Tusaý keser» rásimin atqaryp, kishkentaı búldirshinderge estelik syılyqtar úlestirildi. «Jastar» mádenı-demalys saıabaǵynyń kireberisinde «Jetisý» telearnasynyń 20 jyldyǵyna arnalǵan kórme, merekelik baǵdarlamalar, ulttyq qolóner kórmesi, ulttyq oıyndar jáne t.b. oıyn-saýyq ótkizildi.
«Naýryz tartýy» degen atpen ulttyq taǵamdar – jent, talqan, balqaımaq, kilegeı, qurt, súzbe, ýyz, irimshik jáne basqa da dámder, sol sıaqty ulttyq syı-kádeler qoıyldy. «Uly Dalanyń jeti qyry» kıizúıler alańynda jeti kıizúı tigilip, Elbasy baǵdarlamasy boıynsha «Ashyq aspan astyndaǵy murajaı ekspozısıasynyń» kórmeleri tanystyryldy.
Saıabaqtyń negizgi sahnasynda mereke tabıǵattyń oıanýyn, Naýryz ulaǵaty men rásimderin pash ete bilgen «Kúlimde, Naýryz, kúlimde!» atty mýzykalyq-horeografıalyq kórinispen bastaldy. Án men bıdiń barlyǵy da Naýryz taqyrybyna arnalyp, kóktemniń shýaqty merekesiniń bar sán-saltanatyn, bolmys-bitimin, mán-mazmunyn asha bildi.
Jınalǵan qaýymdy merekemen quttyqtaǵan oblys ákimi Amandyq Batalov:
– Áz Naýryz – eńsesi bıik eldiktiń, irgesi bekem birliktiń, sarqylmas yrystyń bastaýy. Ulystyń uly kúnin halqymyz jyl saıyn shat kóńil, keń peıilmen qarsy alady.
Bul mereke kóp etnosty Qazaqstan halqyn dostyq pen tatýlyqqa shaqyryp, ıgi isterge jumyldyryp keledi. Jyl basy sanalatyn osy mereıli kúnde ótken jyl elimiz úshin tabysty kezeń bolǵanyn rızashylyqpen aıtamyz. Jyl basy Naýryz Otanymyzǵa jańa tabystar ákelsin.
Qazaqstannyń abyroıy artyp, aıbyny asqaq bolsyn! Ulystyń uly kúni ár shańyraqqa baqyt pen shattyq ornap, qut darysyn! Barshańyzǵa kóktemdeı kóńil kúı, molshylyq, bereke-birlik tileımin! Ulys oń bolsyn, mereke qutty bolsyn! – dedi óz quttyqtaýynda.
Sonymen qatar «Batamen el kógerer» respýblıkalyq baıqaýynyń jeńimpazy, aqsaqal Jaqypbek Ómirbek merekelik tilegin bildirip, bata berdi.
Altynaı Jorabaeva, Kámshat Joldybaeva, Álisher Karımov syndy óner juldyzdary men oblystyq óner ujymdary jetisýlyqtarǵa merekelik kóńil kúı sylady.
Eske salsaq, keshkilik «Jastar» saıabaǵynda jastarǵa arnalǵan «Kóktem merekesiniń jaryq juldyzdary» atty eki saǵattyq dıskobaǵdarlama uıymdastyryldy.
