جەتىسۋ جۇرتشىلىعى «جاستار» ساياباعىندا قىدىرىپ، مەرەكەلىك شارالاردى تاماشالادى. وبلىس اكىمى اماندىق باتالوۆ كىشكەنتاي بالعىنداردىڭ تۇساۋىن كەسىپ، كوپشىلىكتى ۇلىس كۇنىمەن قۇتتىقتادى، – دەپ حابارلايدى الماتى وبلىسى اكىمىنىڭ باسپا ءسوز قىزمەتى.
ۇلىستىڭ ۇلى كۇنى – ناۋرىز مەرەكەسى تالدىقورعان قالاسىندا بۇلاقتىڭ كوزىن اشىپ، № 28 ءىت مەكتەپتىڭ الدىنا اعاش وتىرعىزۋدان باستالدى. بۇل ىسكە وبلىس اكىمى اماندىق باتالوۆپەن بىرگە اقساقالدار مەن زيالى قاۋىم وكىلدەرى، اسسامبلەيا مۇشەلەرى، جاستار مەن وقۋشىلار اتسالىستى. قالانىڭ 8-شاعىن اۋدانىنداعى 56 پاتەرلى تۇرعىن ءۇي پايدالانۋعا بەرىلىپ، كىلتتەرى تاپسىرىلدى.
وسى كۇنى «جاستار» سپورت سارايىنىڭ اۋماعىندا ورنالاسقان «تايقازان الاڭىندا» مەرەكەگە ارنالعان 1 توننا باۋىرساق پەن 5 مىڭ ليتر ناۋرىز كوجە كەلگەن ادامدارعا تەگىن تاراتىلدى.
مەملەكەتتىك تۋ الاڭىندا جاستار اۋىلى قۇرىلدى.
اتا-انالاردىڭ سۇراۋىمەن وبلىس اكىمى اماندىق باتالوۆ «تۇساۋ كەسەر» ءراسىمىن اتقارىپ، كىشكەنتاي بۇلدىرشىندەرگە ەستەلىك سىيلىقتار ۇلەستىرىلدى. «جاستار» مادەني-دەمالىس ساياباعىنىڭ كىرەبەرىسىندە «جەتىسۋ» تەلەارناسىنىڭ 20 جىلدىعىنا ارنالعان كورمە، مەرەكەلىك باعدارلامالار، ۇلتتىق قولونەر كورمەسى، ۇلتتىق ويىندار جانە ت.ب. ويىن-ساۋىق وتكىزىلدى.
«ناۋرىز تارتۋى» دەگەن اتپەن ۇلتتىق تاعامدار – جەنت، تالقان، بالقايماق، كىلەگەي، قۇرت، سۇزبە، ۋىز، ىرىمشىك جانە باسقا دا دامدەر، سول سياقتى ۇلتتىق سىي-كادەلەر قويىلدى. «ۇلى دالانىڭ جەتى قىرى» كيىزۇيلەر الاڭىندا جەتى كيىزۇي تىگىلىپ، ەلباسى باعدارلاماسى بويىنشا «اشىق اسپان استىنداعى مۇراجاي ەكسپوزيسياسىنىڭ» كورمەلەرى تانىستىرىلدى.
ساياباقتىڭ نەگىزگى ساحناسىندا مەرەكە تابيعاتتىڭ ويانۋىن، ناۋرىز ۇلاعاتى مەن راسىمدەرىن پاش ەتە بىلگەن «كۇلىمدە، ناۋرىز، كۇلىمدە!» اتتى مۋزىكالىق-حورەوگرافيالىق كورىنىسپەن باستالدى. ءان مەن ءبيدىڭ بارلىعى دا ناۋرىز تاقىرىبىنا ارنالىپ، كوكتەمنىڭ شۋاقتى مەرەكەسىنىڭ بار ءسان-سالتاناتىن، ءبولمىس-بىتىمىن، ءمان-مازمۇنىن اشا ءبىلدى.
جينالعان قاۋىمدى مەرەكەمەن قۇتتىقتاعان وبلىس اكىمى اماندىق باتالوۆ:
– ءاز ناۋرىز – ەڭسەسى بيىك ەلدىكتىڭ، ىرگەسى بەكەم بىرلىكتىڭ، سارقىلماس ىرىستىڭ باستاۋى. ۇلىستىڭ ۇلى كۇنىن حالقىمىز جىل سايىن شات كوڭىل، كەڭ پەيىلمەن قارسى الادى.
بۇل مەرەكە كوپ ەتنوستى قازاقستان حالقىن دوستىق پەن تاتۋلىققا شاقىرىپ، يگى ىستەرگە جۇمىلدىرىپ كەلەدى. جىل باسى سانالاتىن وسى مەرەيلى كۇندە وتكەن جىل ەلىمىز ءۇشىن تابىستى كەزەڭ بولعانىن ريزاشىلىقپەن ايتامىز. جىل باسى ناۋرىز وتانىمىزعا جاڭا تابىستار اكەلسىن.
قازاقستاننىڭ ابىرويى ارتىپ، ايبىنى اسقاق بولسىن! ۇلىستىڭ ۇلى كۇنى ءار شاڭىراققا باقىت پەن شاتتىق ورناپ، قۇت دارىسىن! بارشاڭىزعا كوكتەمدەي كوڭىل كۇي، مولشىلىق، بەرەكە-بىرلىك تىلەيمىن! ۇلىس وڭ بولسىن، مەرەكە قۇتتى بولسىن! – دەدى ءوز قۇتتىقتاۋىندا.
سونىمەن قاتار «باتامەن ەل كوگەرەر» رەسپۋبليكالىق بايقاۋىنىڭ جەڭىمپازى، اقساقال جاقىپبەك ومىربەك مەرەكەلىك تىلەگىن ءبىلدىرىپ، باتا بەردى.
التىناي جورابايەۆا، كامشات جولدىبايەۆا، الىشەر كاريموۆ سىندى ونەر جۇلدىزدارى مەن وبلىستىق ونەر ۇجىمدارى جەتىسۋلىقتارعا مەرەكەلىك كوڭىل كۇي سىلادى.
ەسكە سالساق، كەشكىلىك «جاستار» ساياباعىندا جاستارعا ارنالعان «كوكتەم مەرەكەسىنىڭ جارىق جۇلدىزدارى» اتتى ەكى ساعاتتىق ديسكوباعدارلاما ۇيىمداستىرىلدى.
