Almaty ákimdigi men Qytaidyń ulttyq áýe tasymaldaýshysy Air China arasynda reisterdi ashýǵa járdemdesý týraly memorandýmǵa qol qoiyldy, - dep habarlaidy Dalanews.kz.
Qujatqa Almaty ákimi Erbolat Dosaev Qytaiǵa jumys sapary barysynda jáne China National Aviation Holding Company prezidenti Ma Chonsian myrzamen kezdesý kezinde qol qoidy.
«Almaty — Beijiń» jáne «Almaty — Chendý» jańa áýe reisteri ashylady dep kútilip otyr.
Biyl Qytaidan týristik aǵynnyń ósýi kútilýde, bul Almatynyń mádeni jáne iskerlik ortalyq retinde damýy úshin mańyzdy. Jańa baǵyttardy iske qosý maýsym aiyna josparlanǵan.
Almaty kólik infraqurylymyn jańǵyrtýdy jalǵastyryp otyr. Biyl qalaǵa 2,3 million týrist, onyń ishinde 700 myń sheteldik qonaq keledi dep boljanǵan. Ótken jyly Almatyǵa Qytaidan 95,3 myńnan astam týrist kelgen, bul 54%-ǵa óskenin kórsetedi.
Almaty men Qytai arasynda jańa áýe reisteri ashylady
pixabay.com
