Almatyda 2025 jyly búdjet jobasynda áleýmettik salaǵa 806,1 mlrd teńge bólý josparlanýda, bul aldyn ala aqparat boıynsha qala búdjeti shyǵystarynyń 41% -yn quraıdy. Áleýmettik salany qarjylandyrýdy ulǵaıtýdyń boljamdy ósýi 8,7% -dy quraıdy. 2024 jyly áleýmettik salaǵa 741,2 mlrd., 2023 jyly 664,5 mlrd. baǵyttaldy, dep habarlaıdy Dalanews.kz.
2025-27 jyldarǵa arnalǵan búdjettiń tıisti jobasy Almaty Máslıhatynyń aldaǵy sesıasynda qabyldaý qarastyrylýda. Bul týraly qalalyq Máslıhattyń baspasóz qyzmeti habarlady.
Esterińizge sala keteıik, Máslıhattyń kelesi otyrysynda Almatynyń 2025-2027 jyldarǵa arnalǵan búdjetin bekitý máselesi qaralatyn bolady.
Máslıhattyń aldyn ala aqparaty boıynsha, densaýlyq saqtaý ınfraqurylymyn jańǵyrtýdy qarjylandyrý 2025 jyly 2,6 esege - 69,4 mlrd teńgege deıin ulǵaıady. Sondaı-aq 1326 dáriger men medısınalyq personaldy oqytýdyń úsh deńgeıli baǵdarlamasy iske asyrylady. Jańa búdjetten qarajattyń bir bóligi Bostandyq aýdanynda 500 adam qabyldaıtyn №4 jedel medısınalyq járdem qosalqy stansıasynyń, eki otbasylyq-dárigerlik ambýlatorıanyń jáne jańa emhananyń qurylysyn aıaqtaýǵa baǵyttalady.
Qalalyq medısınalyq mekemeler qajetti dári-dármektermen jáne jabdyqtarmen, onyń ishinde vaksınalarmen jáne ımmýnoprofılaktıkalyq preparattarymen qamtamasyz etiletin bolady. Sırek kezdesetin aýrýlary bar 4 myńnan astam pasıent tegin dári-dármektermen qamtylady.
2025 jyly jedel járdemniń avtoparkin jańartý jalǵasady, ol úshin 50 avtokólik satyp alý josparlanýda. Sonymen qatar 2024-2025 jyldary 20 densaýlyq saqtaý nysany kúrdeli jóndeýden ótedi, onyń ishinde on nysandy 2025 jyly aıaqtaý josparlanyp otyr jáne 30 jańa jáne eski densaýlyq saqtaý nysandaryn jobalaý jumystary jalǵasýda.
