2023 jyldyń basynan bastap Almatyda 650 myńǵa jýyq aǵash pen buta otyrǵyzyldy. Bul týraly Almatyda Ortalyq komýnıkasıalar qyzmetinde ótken brıfıńte qala ákimi Erbolat Dosaev málimdedi.

«Memleket basshysynyń «Almaty – baqsha qala» mártebesin jandandyrý týraly tapsyrmasyn oryndaý maqsatynda 2030 jylǵa deıin 2,5 mln jasyl jelek otyrǵyzý boıynsha jol kartasy bekitildi. 2025 jyldan bastap kóshet egý kezinde Almaty ákimdigi iri kólemdi kóshetterdi jappaı qoldanatyn bolady. Osylaısha bıiktigi 4 jáne 6 metrden asatyn 27 myń kóshet otyrǵyzylady», - dedi ákim.

Almaty qalasynda jasyl jelekterdi qorǵaý jáne kútý qaǵıdalarymen sýarý júıesin mindetti túrde júrgizý jónindegi norma engizildi.

2 jyl ishinde 500 km avtomattandyrylǵan sýarý jáne tamshylatyp sýarý jelileri ornatyldy. 2025 jyly taǵy 290 km osyndaı jeliler ornatylady (somasy 4,1 mlrd.teńge), bul avtomattandyrylǵan sýarý júıesimen 1 mln aǵashqa deıin qamtýdy ulǵaıtýǵa múmkindik beredi.

Almaty qalasynyń jasyl jelekterin otyrǵyzý jáne kútip ustaý boıynsha jańa tásilderdi qoldaný nátıjesinde kóshetterdiń qulap túsýi 2022 jylǵy 30% - dan 2024 jyly 10% - ǵa deıin tómendedi.

Esterińizge sala keteıik, 2024 jyldyń sáýir aıynda «Almaty – bizdiń ortaq úıimiz» aksıasy aıasynda qalany kógaldandyrý boıynsha «Almaty – baqsha qala» aýqymdy aksıasy ótkizildi. Aýdan ákimdikteri alma aleıalaryn qurýǵa jáne butalardy otyrǵyzýǵa belsendi qatysty. Barlyǵy 7 myńnan astam jasyl jelek otyrǵyzyldy, onyń ishinde 4 015 jemis aǵashy, 1 090 japyraqty aǵash jáne 2 600 buta.