Prezident Qasym-Jomart Toqaevtyń tapsyrmasy boiynsha el ekonomikasyn kóterýdegi jańa baǵdar, onyń ishinde memleket naryǵyndaǵy iri monopolistermen kúres óz jemisin berýde. Atap aitqanda, jyl basynan beri «Qazaqtelekom» aktsiialarynyń belgili bir bóligi memleket menshigine qaitaryldy.
Alaida, Ulttyq bailanys operatorynyń jumysyndaǵy shikilikterge tutynýshylar narazylyǵy áli de toqtamai tur. Monopolist kompaniianyń qiturqy «shemalarynan» bailanys qyzmetterin adal tutynýshylar zardap shegýde.
Mindettemelerine salǵyrt qaraityn operatordyń aila-tásilderiniń kesiri «Alataý Aqparat» jaýapkershiligi shekteýli seriktestigine de tidi.
Kóptegen jyl boiy «Qazaqtelekom» aktsionerlik qoǵamy «Alataý Aqparat» jaýapkershiligi shekteýli seriktestigine (ataýy ózgergenge deiin «Almaty aqshamy» gazeti» JShS jáne «Vechernii Almaty «gazeti» JShS bolǵan) qyzmet kórsetip kelgen.
2020 jyldyń qyrkúieginde «Alataý Aqparat» JShS-nyń býhgalteriiasy qarjylai shyǵystardy zerdelep, baqylaý barysynda «Qazaqtelekomnyń» kórsetiletin qyzmetterge sáikes kelmeitin somadaǵy aqshalai ótem suraǵanyn anyqtaidy.
Istiń mán-jaiyna qanyǵý úshin «Alataý Aqparat» kompaniiasy Ulttyq bailanys operatorynyń keńsesine hat joldady.
«Qazaqtelekom» qyzmetkerleri óz jaýabynda «Alataý Aqparat» JShS-yna 319 (!) abonenttik telefon nómirleri tirkelgenin habarlady.
Oǵan qosa kóp jyldan bergi turaqty oqyrmandarymyzǵa jaqsy tanys «Almaty aqshamy» jáne «Vechernii Almaty» gazetteri redaktsiialarynyń burynǵy meken-jailarynda (Abylai han dańǵyly, 2, Almaty-2 vokzalynyń janynda) taǵy bes abonenttik nómirdiń tiesili ekenin aitady. Aita ketken jón, bizdiń basylymdar aitylǵan mekenjaidan 2011 jyly kóship ketken!
«Alataý Aqparat» atyndaǵy úsh júzden astam abonent týraly aitqanda, myna faktini oiǵa alǵan jón: bizdiń kompaniianyń shtatynda dástúrli túrde 80-ge jýyq adam jumys isteidi. Bul tártip qanshama jyldan beri ózgermegen.
Bizdiń kompaniiaǵa úsh júzden astam abonenttik nómirdiń jazylýy kelesidei jaǵdaida oryn alǵan: bir kezderi internet bailanystyń sapasyna narazy bolǵan «Almaty aqshamy» jáne «Vechernii Almaty» basylymdarynyń basshylary Ulttyq operatordan bul jaǵdaidy durystaýdy ótinedi.
«Qazaqtelekom» ókilderi óz kezeginde jańa sharttar ákelip, qujattarǵa qol qoiylǵannan keiin barlyq máselelerdi sheshýge ýáde beredi.
Aitylǵan ýaqytta internetke qosylý jyldamdyǵy sekýndyna nebári 6 Mbit boldy. Bul jyldamdyqtyń jumysy aqparat taratýǵa negizdelgen 80 adamdyq ujym úshin óte az ekeni aitpasa da túsinikti.
Atalmysh jańa sharttarǵa qol qoiylǵannan keiin «Alataý Aqparat» kompaniiasy úsh júz abonenttik nómirdiń iegeri boldy. Alaida, internetke qosylý jyldamdyǵy ýáde etilgendei emes, nebári 2 Mbitke ulǵaidy. Qyzmet kúshi 6 Mbit ornyna 8 Mbit bolǵanymen, qyzmet quny aiyna 480 myń teńgege deiin ósken.
«Qazaqtelekom» kompaniiasy jeke tulǵalarǵa jyldamdyǵy sekýndyna 100-den 500 Mbitke deiin jetetin qyzmetterdi bar bolǵany 7 myń teńgege jalǵaitynyn eskersek, internet bailanysy álsiz úsh júz abonenttik nómirge jarty million teńgege jýyq aqsha alýy ádil qyzmetke emes, alaiaqtardyń arbaýyna uqsaidy.
Bul dáleldi aiǵaqtarymyzben monopolist kompaniia ókilderi alǵashqyda kelisedi. Sóitip, «Alataý Aqparat» JShS men «Qazaqtelekom» AQ arasynda kelissóz júrgizip, nátijesinde qaita esep júrgizýge ýaǵdalasady. Alaida, is júzinde Ulttyq operator qyzmetkerleri bul baǵyttaǵy jumys barysyn soza bergendikten, olarǵa bizdiń taraptan taǵy da hat joldanady. Oǵan tiisti másele «Almaty telekom» óńirlik telekommýnikatsiia direktsiiasynyń qaraýyna shyǵarylǵany jóninde jaýap aldyq.
«Qazaqtelekom» 2020 jyldyń 24 qarashasynda óńirlik direktsiianyń 2 297 000 teńge sommaǵa qaita esepteý júrgizgeni týraly esep berdi. 2021 jyldyń 29 qańtar kúni Ulttyq operator ishki tekserýler negizinde qaita esepteý somasy 8 575 921 teńgege deiin óskenin jáne kináli qyzmetkerler men onyń tikelei basshysyna tártiptik jazalaý sharalary qabyldanǵanyn habarlady.
Degenmen, bir jyldan astam ýaqyt boiy eseptelgen 8,5 million teńge «Alataý Aqparat» JShS-ine qaitarylmady. Osyǵan orai bizdiń tarapymyzdan ótken jyldyń aqpan aiynda «Qazaqtelekom» aktsionerlik qoǵamynyń ústinen sotqa deiingi shaǵym jiberildi. Alaida, kompaniia ókilderi ýaǵdalastyqtan, kelissózden jaltara bastady. Sotqa deiingi taǵy bir shaǵym jiberilgende, olar óz esepterimen ózderi kelispeitinin jáne eshqandai qarajatty keri qaitarmaitynyn málimdedi.
Almatynyń mamandandyrylǵan aýdanaralyq sotynda «Qazaqtelekomǵa» qarsy talaptardy qaraý bir jylǵa jýyq ýaqytqa sozyldy. Osy ýaqyt ishinde «Qazaqtelekom» AQ zańgerleri «Alataý Aqparat» JShS-na 1,6 million teńge bereshek somasyn óndirip alý týraly qarsy aryz jazady. MAES 2021 jy ldyń jeltoqsanynda kelip túsken bul aryzdy osy jyldyń aqpan aiynda qanaǵattandyryp, bizdiń kompaniiamyzǵa 8,5 million teńgeni qaitarý týraly talapty qabyldaýdan bas tartty.
Sottyń sheshim shyǵarýdaǵy dálelderin erekshe atap ótken jón. Óz sheshimin qandai da bir faktilerge negizdeý úshin sot «Qazaqtelekomnyń» esepteýdegi óz qatelikterin moiyndaityn hattaryn sanaýdan bas tartty.
Onyń sebebin «Qazaqtelekom» bul hattardy keiin qaitaryp aldy» dep túsindirdi. Azamattyq kodekske sáikes, hattarmen qosymsha rastalǵan óz mindettemelerinen birjaqty bas tartýǵa bolmaidy. Osy dálelderge qaramastan, Almaty MAES monopolistiń paidasyna sheshim shyǵaryp, «Qazaqtelekomǵa» aila-tásilmen aqsha óndirýdegi qiturqy is-áreketterin jalǵastyrýǵa múmkindik bergendei boldy.
Qazir júrip jatqan iri monopolistermen kúres barysynda tiisti organdar quryǵy uzyndyǵyn paidalanyp jaýapkershilikten jaltaryp júrgen Ulttyq bailanys operatory qyzmetiniń osy bóligin muqiiat tekseredi dep úmittenemiz.
"Almaty aqshamy" gazeti
